ᓄᓇᓕᓐᓂᒥᐅᑕᐅᓗᓂ ᐱᓕᕆᔨᐅᓗᓂ ᐱᕈᕐᓯᒪᓪᓗᓂ ᖃᖏᖦᖠᓂᕐᒥ, ᓄᓇᕗᑦ, ᑰᑎ ᑏᓐ ᖃᐅᔨᒪᑦᑎᐊᖅᑐᖅ ᐊᒻᒪ ᐊᑐᖅᐸᑦᑐᓂ ᖃᓄᑐᐃᓐᓇᖅ ᐱᔾᔪᑎᑦᓴᓂᑦ ᓇᖕᒥᓂᖃᖅᑎᒍᑦ. ᑰᑎ ᖃᐅᔨᒪᔭᐅᕙᑦᑐᖅ ᐃᓄᑦᑎᐊᕙᐅᓂᖓᓄᑦ, ᐅᖃᑦᑕᐃᓕᒪᒍᓐᓇᖏᓐᓂᖓᓄᑦ, ᓱᓕᔪᓐᓇᕐᓂᖓᓄᑦ, ᐃᖕᒥᓂᒃ ᐅᑉᐱᕆᑦᑎᐊᕐᓂᖓᓄᑦ ᐊᒻᒪ ᐱᓕᕆᔪᓐᓇᕐᓂᖓᓄᑦ. ᑕᒪᒃᑯᐊ ᖃᓄᐃᒍᑎᒋᔭᖏᑦ, ᐊᒻᒪ ᓂᐅᕐᕈᑎᓕᕆᔨᐅᔪᓐᓇᑦᑎᐊᕐᓂᖓᓄᑦ ᐊᒻᒪ ᖁᕕᐊᓇᖅᑐᓂᑦ ᑕᑯᓐᓇᐸᓐᓂᖓ ᐱᓪᓗᒍ ᓯᕗᒧᐊᒍᑎᒋᓯᒪᑦᑎᐊᖅᑕᖏᑦ ᐃᓕᓯᒪᑦᑎᐊᓕᖅᑐᓂ ᓇᖕᒥᓂᖃᖅᑎᐅᓗᓂ ᓴᓇᕕᓕᕆᓂᕐᒥᑦ ᐱᓕᕆᕝᕕᓕᕆᓂᕐᒥᑦ.
ᐊᐱᕆᔭᐅᒐᒥ ᖃᓄᖅ ᑕᑯᓐᓇᖕᖑᐊᒐᕐᒥᓂᒃ ᐱᓪᓗᒍ ᑲᒻᐸᓂᖁᑎᖓ, ᑲᓇᑐᕆᐅᓪ ᓕᒥᑕᑦ, ᑰᑎ ᑕᑯᓐᓇᖑᐊᑎᑦᓯᕙᑦᑐᖅ ᓯᕗᓂᕐᒥᑦ ᑲᔪᓯᑦᓯᐊᖅᑐᒥᑦ ᐱᕈᖅᐸᓪᓕᐊᓂᕐᒥᑦ, ᐱᓕᕆᔾᔪᑎᒍᑦ ᓯᕗᒧᐊᒍᑎᓕᕆᓂᕐᒥᑦ, ᐊᔾᔨᒌᖏᑦᑐᓂᑦ ᐊᐅᓚᑦᑎᔾᔪᑎᓂᑦ, ᐃᓄᖕᓂᒃ ᐱᓕᕆᑎᑦᑎᓂᕐᒥᑦ ᐊᒻᒪ ᖃᓄᐃᖏᓯᐊᖅᑐᓂᑦ ᓇᖕᒥᓂᖃᕐᓂᒃᑯᑦ ᐱᓕᕆᖃᑎᒌᒍᑎᓂᑦ. ᐅᖃᐅᓯᖃᐃᓐᓇᐸᑦᑐᖅ ᖃᓄᖅ ᐱᒻᒪᕆᐅᓂᖏᓐᓂᑦ ᐋᖅᑭᑦᓱᐃᓂᕐᒥᑦ ᐸᕐᓇᒍᑎᑦᓴᐅᔪᓐᓇᖅᑐᓂᑦ ᑲᑐᔾᔨᖃᑎᒌᒍᑎᓂᑦ ᐊᒻᒪ ᐱᕈᐃᒐᓱᑉᐸᓪᓕᐊᑐᐃᓐᓇᕐᓗᓂ ᑕᒪᒃᑯᓂᖓ ᐱᓕᕆᖃᑎᒌᒍᑎᓂᑦ. ᑕᒪᒃᑯᓅᓇ ᐱᓕᕆᖃᑎᒌᓐᓂᒃᑯᑦ ᑰᑎ ᓴᖅᑮᔪᓐᓇᓕᓚᐅᖅᑐᖅ ᓯᕗᓪᓕᖅᐹᒥᓂᒃ ᑲᒻᐸᓂᖁᑎᒥᓂᒃ, ᑏᓐ ᐱᓕᕆᔾᔪᑎᓂᑦ ᐱᔨᑦᓯᕋᐅᑎᓕᕆᓂᕐᒥᑦ ᑯᐊᐳᕇᓴᓐ, ᐊᒻᒪ ᑐᓪᓕᐊᓂᑦ ᓇᖕᒥᓂᖅᑖᕈᓐᓇᓯᓪᓗᓂ, ᑲᓇᑐᕆᐅᓪ ᓕᒥᑕᑦ.
ᑏᓐ ᐱᓕᕆᔾᔪᑎᓂᑦ ᐱᔨᑦᓯᕋᐅᑎᓕᕆᓂᕐᒥᑦ ᑯᐊᐳᕇᓴᖓᑦ ᓴᖅᑭᖅᑕᐅᓚᐅᕐᓂᑯ ᑭᐅᔾᔪᑎᐅᓗᓂ ᓇᖕᒥᓂᖃᐅᑎᑦᓴᒥᑦ ᓴᖅᑭᖅᑐᖃᕐᒪᑦ ᓄᓇᕘᑉ ᐊᖏᔪᖅᑳᖃᕐᕕᖓᓐᓂ, ᐃᖃᓗᐃᑦ. ᑰᑎ ᐅᖃᖅᑐᖅ ᐃᒪᐃᒍᓐᓇᓚᐅᖏᓐᓇᒥ, “ᓯᓚᑖᓃᑐᐃᓐᓇᖅᑐᓂ, ᐃᓗᒧᑦ ᑕᑯᓐᓇᖅᑐᓂ,” ᐃᓚᒋᔭᐅᒋᐊᖃᓚᐅᕋᒥ. ᓄᑖᖑᓪᓗᓂ ᐊᒻᒪ ᐱᓕᒻᒪᓴᕐᓯᒪᑦᑎᐊᖅᑐᓂ ᐅᐊᔭᓕᕆᔨᐅᓗᓂ, ᑰᑎ ᑲᑐᔾᔨᖃᑎᖃᓕᓚᐅᖅᑐᖅ ᕙᓛᕐᑦ ᓴᓇᔨᓂᑦ ᐊᒻᒪ ᓯᕗᓪᓕᐹᑦᓯᐊᒥᑦ ᐊᖏᔪᒥᑦ ᑳᓐᑐᕌᑎᒍᑦ ᐱᓕᕆᐊᑦᓴᑖᓕᖅᑐᓂ. ᑲᔪᓯᑦᓯᐊᓚᐅᖅᑎᓪᓗᒍ ᐅᓇ ᐱᓕᕆᐊᑦᓴᖅ, ᑰᑎ ᑮᓇᐅᔭᐃᔭᐅᑎᖃᒃᑲᓐᓂᓕᓚᐅᖅᑐᖅ ᑮᓇᐅᔭᓕᐊᕆᓚᐅᖅᑕᒥᓂᒃ ᐊᒻᒪ ᓂᐅᕕᐊᕆᓕᖅᑐᓂᐅᒃ ᑲᓇᑐᕆᐅᓪ ᓕᒥᑕᑦ, ᑲᒻᐸᓂᐅᔪᑦ ᐃᓪᓗᖃᕐᕕᑦᓴᓂᑦ ᐳᑑᕆᔨᐅᔪᑦ ᑐᖕᖓᕕᑦᓴᖏᓐᓂᑦ. ᐅᓇ ᐊᖏᔪᑲᓪᓚᐅᓚᐅᖅᑐᖅ ᓇᖕᒥᓂᖃᕐᓂᒃᑯᑦ ᐋᖅᑭᒍᑎᒋᓚᐅᖅᑕᖓ ᐊᑐᖁᔭᐅᓚᐅᖅᑐᖅ ᐃᓕᓴᐃᔨᒋᓯᒪᔭᖓᓂᑦ ᐱᓕᕆᓯᒪᑦᑎᐊᖅᑐᒥᑦ ᐊᒻᒪ ᑮᓇᐅᔭᓕᐅᕈᑎᓕᕆᕐᓂᑦᒥ ᖃᐅᔨᒪᑦᑎᐊᖅᑐᒥᑦ.
ᓱᓇᒃᑯᑖᖃᖅᑐᓂ ᓈᒻᒪᑦᑐᓂᑦ ᑳᐳᑐᓂᑦ, ᑕᖏᖃᑦᑎᐊᖅᑐᒥᑦ ᑕᑯᓐᓇᖕᖑᐊᒐᕐᒥᑦ ᐊᑐᕈᒪᔭᕐᒥᓂᒃ ᐊᒻᒪ ᓈᒻᒪᑦᑐᓂᑦ ᐅᖃᐅᔾᔪᐃᔾᔪᓯᕐᓂᒃ, ᑰᑎ ᕿᓂᓕᓚᐅᖅᑐᖅ ᑮᓇᐅᔭᓕᕆᔾᔪᑎᒍᑦ ᐋᖅᑭᒍᑎᑦᓴᓂᑦ ᓂᐅᕕᐊᕆᔪᒪᓪᓗᒍ ᑲᓇᑐᕆᐅᓪ ᓕᒥᑕᑦ ᐊᑐᖅᑐᐊᕐᕕᒃ ᑎᒥᖁᑎᖓᓐᓂᑦ ᐱᑎᑕᐅᓕᓚᐅᖅᑐᖅ ᑮᓇᐅᔭᖅᑖᕆᔭᕆᐊᓕᖏᓐᓂᑦ ᐃᑲᔫᑎᑦᓴᓂᑦ ᓇᖕᒥᓂᖃᕈᒪᓂᒃᑯᑦ ᑐᕌᒐᕆᔭᖏᓐᓂᑦ ᓴᖅᑭᖁᓪᓗᒋᑦ. ᐊᑐᖅᑐᐊᕐᕕᒃᑯᑦ ᐅᖃᐅᔾᔭᐅᕙᓚᐅᖅᑐᑦ ᐃᑲᔫᑎᑦᓴᓂᑦ ᐊᒻᒪ ᐊᔭᐅᖅᑐᖅᑕᐅᓗᓂ ᓇᖕᒥᓂᖅᑖᕋᓱᐊᖅᑎᓪᓗᒍ. ᐱᓕᕆᖃᑎᒌᒍᑎᒋᓚᐅᖅᑕᖓᑦ ᑭᖑᓂᐊᒍᑦ ᐱᕈᓗᐊᓚᐅᖅᑐᖅ ᑕᑎᒌᑉᐸᑦᑐᑎᒃ ᐊᒻᒪ ᐃᑉᐱᒋᖃᑎᒌᑦᑎᐊᐸᑦᑐᑎᒃ. ᑲᑐᔾᔨᖃᑎᒌᓐᓂᒃᑯᑦ, ᑕᒪᒃᑮᒃ ᑰᑎ ᐊᒻᒪ ᐊᑐᖅᑐᐊᕐᕕᒃ ᑐᓂᕐᕈᑎᖃᖅᑐᐃᓐᓇᐅᔫᒃ ᖃᓄᐃᖏᑦᑎᐊᕈᑎᑦᓴᐅᔪᓂᑦ ᐊᒻᒪ ᐱᕈᖅᐸᓪᓕᐊᑦᑎᐊᖅᑐᒥᑦ ᓇᖕᒥᓂᖃᖅᑐᓕᕆᓂᕐᒧᑦ ᓄᓇᕘᒥ. ᐅᖃᐅᓯᐅᒋᐊᖃᕐᒥᔪᖅ ᑰᑎ ᐃᖅᑲᓇᐃᔭᖅᑎᖃᖅᐸᒻᒪᑦ ᒪᒃᑯᑦᑐᓂᑦ ᐃᓕᓐᓂᐊᐸᓪᓕᐊᓯᓐᓈᖅᑐᓂᑦ ᐱᓕᒻᒪᓴᖅᑎᑕᐅᕙᑦᑐᑎᒃ ᐱᓪᓗᐊᑕᐅᔪᓂᑦ ᐃᖅᑲᓇᐃᔮᑦᓴᓄᑦ, ᓲᕐᓗ ᐊᐅᖅᑭᔾᔪᑎᓂᑦ, ᐳᑑᕆᔾᔪᑎᓂᑦ ᐊᒻᒪ ᕿᖕᖑᑎᒍᑦ ᖃᐅᔨᓴᐅᑎᓂᑦ. ᐃᓄᖕᓄᑦ ᓴᖅᑮᕙᑦᑐᖅ ᐱᕕᖃᐅᑎᑦᓴᓂᑦ ᐃᖅᑲᓇᐃᔮᑦᓴᒃᑯᑦ ᐊᒻᒪ ᓯᕗᓕᖅᑎᐅᓂᒃᑯᑦ ᐃᖅᑲᓇᐃᔮᑦᓴᓂᑦ.
ᑰᑎ ᑏᓐ ᓯᕗᓕᖅᑎᐅᓂᒃᑯᑦ ᐆᑦᑑᑎᑦᓯᐊᕙᐅᔪᓐᓇᖅᑐᖅ ᐱᕈᕐᕕᒥᓂᕐᒥᓂ ᐅᑭᐅᖅᑕᖅᑐᒥᐅᑕᐅᓗᓂ ᐱᓕᕆᔪᓐᓇᓯᐊᖅᑐᓂ. ᓇᓗᓇᐃᕐᓯᓯᒪᑦᑎᐊᖅᑐᖅ ᐱᓕᕆᔪᒪᓂᕐᒥᓂᒃ ᓴᖅᑮᓂᒃᑯᑦ ᖃᓄᐃᖏᓯᐊᖅᑐᓂᑦ ᓇᖕᒥᓂᖃᕐᓂᒃᑯᑦ ᐱᓕᕆᖃᑎᒌᒍᑎᐅᔪᓐᓇᖅᑐᓂᑦ, ᕿᓂᖅᐸᓂᕐᒥᑦ ᐃᓕᓴᐃᔨᑦᓴᓂᑦ ᐊᒻᒪ ᐅᖃᐅᔾᔪᐃᔨᑦᓴᓂᑦ, ᐊᒻᒪ ᐱᓕᕆᔾᔪᑎᖃᕐᓂᒃᑯᑦ ᐱᓕᒻᒪᑦᓴᐅᑎᒋᓯᒪᔭᖏᓐᓂᑦ ᐃᓄᐃᑦ ᐃᖅᑲᓇᐃᔭᖅᑎᐅᔪᑦ. ᐊᑐᖅᐸᑦᑐᒋᑦ ᖃᐅᔨᒪᓂᖏᑦ, ᓄᑖᓂᑦ ᓴᖅᑮᓇᓱᐊᖅᐸᓂᒃᑯᑦ ᐊᒻᒪ ᐊᐅᓚᑦᑎᓂᒃᑯᑦ ᖃᑭᒪᑦᑎᐊᖅᑐᓂᑦ ᓇᖕᒥᓂᖃᐅᑎᓂᑦ, ᑰᑎ ᐱᒻᒪᕆᐅᖃᑕᐅᓕᖅᑐᖅ ᓄᓇᕘᒥ ᐱᕈᖅᐸᓪᓕᐊᔪᓂᑦ ᑮᓇᐅᔭᓕᕆᔾᔪᑎᑦᓴᓂᑦ.
ᐅᓇ ᓇᕿᖁᔪᖅ ᐅᖃᓕᒫᕈᒪᒍᕕᒋᑦ ᐅᖃᓕᒫᒐᐃᑦ ᐱᓯᒪᔪᑦ ᓄᓇᖃᖅᑳᕐᓯᒪᔪᓂᑦ ᓇᖕᒥᓂᖃᕐᓂᕐᒥᑦ ᐅᖃᓕᒫᒐᕐᓂ (Aboriginal Business Quarterly).