ᐅᑭᐅᖅᑕᖅᑐᒥ, ᓱᓇᑐᐃᓐᓇᕐᓂᑦ ᐃᓕᑦᑐᕆᐊᖃᖅᑐᑎᑦ; ᑕᒪᓐᓇ ᐊᑐᖅᑕᐅᕙᒻᒪᑦ ᓇᒧᑐᐃᓐᓇᖅ ᐊᖅᑯᑎᖃᓗᐊᖏᑦᑐᓂ ᓄᓇᓕᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐊᒥᓱᓂ ᑕᑯᕙᓐᓂᐊᖅᑐᑎᑦ ᐱᒃᑲᐅᓕᖅᐸᑦᑐᓂᑦ ᐊᑕᐅᓯᐅᓗᐊᒥ ᐱᓕᕆᔾᔪᑎᓂᑦ ᓇᖕᒥᓂᖃᐅᑎᖏᑦ ᐊᖏᓪᓕᕙᓪᓕᐊᓂᖏᓐᓄᑦ ᐱᓪᓗᒋᑦ ᑭᖕᖒᒪᔭᒐᐅᕙᑦᑐᑦ ᓄᓇᓕᓐᓂ ᐃᓄᑭᓐᓂᕐᓴᓂ. ᐱᓪᓗᒍ ᑲᒻᐸᓂᐅᔪᖅ ᑕᐃᔭᐅᔪᖅ ᔭᐃᒍ ᐱᔨᑦᓯᕋᐅᑎᓕᕆᓂᖅ, ᐃᖃᓗᑦᑑᖅᑎᐊᕐᒥ, ᓄᓇᕗᑦ, ᐱᒋᐊᓚᐅᕐᓯᒪᔪᑦ ᓱᓪᓗᓕᓕᕆᔨᐅᓗᑎᒃ, ᐅᖅᑰᓴᐅᑎᓕᕆᔨᐅᓗᑎᒃ ᐊᒻᒪ ᐅᐊᔭᓕᕆᔨᐅᓗᑎᒃ 2007−ᖑᑎᓪᓗᒍ. ᔭᐃᒍ ᐱᔨᑦᓯᕋᐅᑎᓕᕆᓂᖅ ᓱᓕ ᑖᒃᑯᓂᖓ ᐊᑑᑎᓕᒻᒪᕆᓐᓂᑦ ᐃᖅᑲᓇᐃᔮᖃᖅᐸᑦᑐᑦ ᓴᓇᔨᓄᑦ ᓱᓇᑐᐃᓐᓇᕐᓂᑦ, ᑭᓯᐊᓂ ᓇᖕᒥᓂᖃᖅᑎᐅᔪᑦ ᖃᐅᔨᓕᓚᐅᖅᑐᑦ ᐊᖏᓪᓕᒋᐊᕆᐊᖃᕐᓂᕐᒥᓂᒃ. ᑲᒻᐸᓂᐅᔪᑦ ᐃᓚᕙᓪᓕᐊᑐᐃᓐᓇᓚᐅᖅᑐᑦ ᐱᔨᑦᓯᕋᐅᑎᖏᓐᓂᑦ ᖃᓄᑐᐃᓐᓇᖅ ᑳᓐᑐᕌᑎᒍᑦ ᐱᓕᕆᐊᑦᓴᓂᑦ, ᓱᓇᒃᑯᑖᓂᑦ ᐊᑐᖅᑐᐊᕐᕕᐅᕙᑦᑐᑎᒃ, ᐊᒻᒪ ᑮᓇᐅᔭᓂᑦ ᐊᑐᖅᑐᐊᖅᑐᑎᒃ ᐊᑐᖅᑐᐊᕐᕕᒃ ᑎᒥᖁᑎᖓᓐᓂᒃ, ᒪᑐᐃᕐᓯᓚᐅᖅᑐᑦ ᓯᓂᑦᑕᕕᒻᒥᑦ ᐊᒻᒪ ᐅᓪᓛᕈᒻᒥᑕᓕᒻᒥᑦ ᑕᐃᔭᐅᔪᒥᑦ ᐅᒥᖕᒪᒃ ᓛᑦᔾ.
ᐅᐃᐅᓪᕗᕋᑦ ᐅᐃᐅᓪᑳᒃᔅ ᐊᒻᒪ ᕈᖦ ᓂᑉᑖᓇᑎᐊᒃ-ᐅᐃᐅᓪᑳᒃᔅ ᐊᐃᑉᐸᕇᖑᔫᒃ ᓇᖕᒥᓂᖃᖅᑎᐅᓗᑎᒃ ᔭᐃᒍ ᐱᔨᑦᓯᕋᐅᑎᓕᕆᓂᖅ ᐊᒻᒪ ᐅᒥᖕᒪᒃ ᓛᑦᔾᒥᑦ ᕿᑎᕐᒥᐅᓂ ᓄᓇᓕᖃᕐᕕᖏᓐᓂ ᓄᓇᕘᒥ. ᖃᐅᔨᑦᑕᐅᑎᒋᐸᓗᓚᐅᕐᒪᑎᒃ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᖃᑎᖃᖅᐸᓐᓂᖅ ᐊᒻᒪ ᐱᕈᐃᕙᓐᓂᖅ ᐱᓕᕆᖃᑎᒌᒍᑎᑦᓴᓂᑦ ᐊᑐᖅᑐᒻᒪᕆᐅᒻᒪᑕ ᑲᔪᓯᑦᑎᐊᕈᒪᓂᐊᕐᓗᓂ ᐱᕙᓪᓕᐅᑎᑦᓯᐊᖅᑐᒥᑦ ᓇᖕᒥᓂᖃᐅᑎᒥᑦ. ᑲᑐᔾᔨᖃᑎᒌᒍᑎᓂᑦ ᐊᑐᖅᑐᑎᒃ ᐃᑲᔫᑎᒋᓯᒪᔭᖓᑦ ᑲᒻᐸᓂᖁᑎᒥᓂᒃ ᐃᓂᓪᓚᑦᓴᐃᓂᕐᒥᑦ ᐊᒻᒪ ᖃᑭᔾᔪᑎᒋᓪᓗᒍ. ᑕᒪᓐᓇ ᐅᖃᖅᑐᒍ, ᐳᐃᒍᐃᓚᐅᕐᓯᒪᖕᖏᑦᑑᒃ ᑲᔪᖏᕆᐊᕈᑎᒋᓚᐅᖅᑕᖓᑦ ᐱᒋᐊᕈᑎᖃᕐᓂᕐᒥᑦ ᓇᖕᒥᓂᖁᑎᒥᓂᒃ ᐱᓚᐅᕐᒪᑕ ᖃᐅᔨᒪᓂᕐᒥᑦ ᐱᔾᔪᑎᐅᔪᓐᓇᖅᑐᒥᑦ ᓴᖅᑭᑕᐅᔪᒥᑦ ᐃᓄᒋᐊᑦᓯᕙᓪᓕᐊᑐᐃᓐᓇᖅᑐᒥ ᓄᓇᓕᖃᕐᕕᓐᓂ ᐊᒻᒪ ᓄᓇᕘᒥᑦ ᐊᒻᒪᑦᑕᐅᖅ ᐊᔭᐅᖅᑕᐅᓚᐅᕐᓂᖏᒃ ᐃᓚᖏᓐᓂᑦ ᐱᓇᓱᐊᖁᔭᐅᓗᑎᒃ ᐊᔾᔨᐅᖏᑦᑐᒥᑦ. ᑲᔪᖏᕐᓱᐃᔾᔪᑎᖃᓗᐊᓚᐅᕐᒥᔫᒃ ᐊᑐᖅᑐᐊᕐᕕᒃ ᑎᒥᖁᑎᖏᓐᓄᑦ ᐊᐅᓚᑦᑎᔨᒻᒪᕆᐅᓚᐅᖅᑐᒥᑦ ᐅᖃᓚᐅᖅᑐᒥᑦ, “ᑲᒻᐸᓂᐅᔪᑦ ᐊᑐᖅᑐᐊᕐᓯᒪᔭᕐᒥᓂᒃ ᐊᑭᓕᕐᓱᐃᕙᖏᑦᑐᑦ, ᑕᐃᒃᑯᐊ ᑭᓯᐊᓂ ᐃᓄᖏᑦ ᑲᒻᐸᓂᐅᑉ ᐃᓗᐊᓃᑦᑐᑦ ᐊᑭᓕᕐᓱᐃᔨᐅᔪᑦ ᐊᑐᖅᑐᐊᒐᕐᓂᒃ.” ᐅᑯᐊ ᐅᖃᐅᓯᐅᓯᒪᔪᑦ ᐃᖅᑲᐃᑎᑦᓯᔾᔪᑎᒋᕙᑦᑕᖏᑦ ᑕᑯᓐᓇᐃᓐᓇᕋᓱᓐᓂᕐᒥᑦ ᖃᓄᖅ ᐱᒻᒪᕆᐅᓂᖏᓐᓂᑦ ᐃᖅᑲᓇᐃᔭᖅᑎᖁᑎᓂ ᑲᒻᐸᓂᖁᑎᖓᓐᓂ.
ᐅᓪᓗᒥ, ᔭᐃᒍ ᐱᔨᑦᓯᕋᐅᑎᓕᕆᓂᖅ ᐃᖅᑲᓇᐃᔭᖅᑎᖃᓕᖅᑐᑦ 15−ᓂᑦ, ᐊᕝᕙᖏᑦ ᐃᓅᓪᓗᑎᒃ, ᐅᒥᖕᒪᒃ ᓛᑦᔾᒥ ᒪᕐᕉᓐᓂᒃ ᖃᐅᑕᒫᖅᑐᖅᓯᐅᑏᓐᓂᑦ ᐃᖅᑲᓇᐃᔭᖅᑎᖃᖅᑐᓂ ᐊᒻᒪ ᒪᕐᕉᓐᓂᒃ ᐅᓪᓘᑉ ᐃᓚᖓᓂ ᐃᖅᑲᓇᐃᔭᖅᐸᑦᑑᓐᓂᒃ. ᐱᔨᑦᓯᕋᐅᑎᖃᕐᓂᖅ ᐱᒻᒪᕆᐅᔪᖅ ᐱᔨᑦᓯᕋᐅᑎᓕᕆᓂᒃᑯᑦ ᐊᒻᒪ ᑐᖕᖓᓇᕐᓂᒃᑯᑦ ᐊᒻᒪ ᐅᐃᐅᓪᑳᒃᔅᑯᒃ ᐊᐃᑉᐸᕇᒃ ᓇᓗᓇᐃᕐᕆᐊᕐᓯᒪᔪᐃᓐᓈᒃ ᐃᖅᑲᓇᐃᔭᖅᑎᖁᑎᖏᑦ ᐱᒻᒪᕆᐅᔪᒥᑦ ᐊᑑᑎᖃᕐᓂᖏᓐᓂᑦ ᑐᓂᕐᕈᑎᖃᖅᐸᓂᒃᑯᑦ ᓇᖕᒥᓂᖁᑎᖓᑕ ᑲᔪᓯᑦᓯᐊᕈᑎᖏᓐᓄᑦ. ᐃᖅᑲᓇᐃᔭᖅᑎᖁᑎᖏᑦ ᐃᖅᑲᓇᐃᔭᖃᑎᒌᑦᑎᐊᐸᑦᑐᑦ ᑲᑐᔾᔨᓗᑎᒃ ᐊᒻᒪ ᖃᐅᔨᒪᔭᐅᑦᑎᐊᖅᑐᑎᒃ ᐱᔨᑦᓯᕋᖅᑎᑦᓯᐊᕙᐅᓂᖏᓐᓄᑦ ᑐᖕᖓᓇᑦᑎᐊᐸᓐᓂᖏᒍᑦ ᐊᒻᒪ ᓇᓗᓇᐃᕐᓯᒪᓇᓱᑉᐸᑦᑐᑎᒃ ᓛᑦᔾᒦᑦᑐᑦ ᐊᑲᐅᑦᑎᐊᕋᓗᐊᕐᒪᖔᑕ ᐊᒻᒪ ᑐᔪᕐᒥᔫᔮᖅᐸᖏᒃᑲᓗᐊᕐᒪᖔᑕ. ᖃᖓᓚᐅᓱᖓᒃᑯᑦ, ᓛᑦᔾᒥ ᐃᖅᑲᓇᐃᔭᖅᑎᐅᔪᑦ ᐅᖃᐅᓯᖃᖅᐸᑦᑐᑦ ᓇᑯᕆᕙᒃᑲᒥᒋᑦ ᐱᔨᑦᓯᕋᐅᑎᒋᓪᓗᒋᑦ ᖃᐃᕙᑦᑐᑦ ᓂᖅᑎᐅᕈᑎᕙᑦᑐᒋᑦ ᓂᖅᑎᐊᒐᒥᓂᒃ ᓲᕐᓗ ᐊᒋᕐᒋᖅᐸᒥᓂᓕᐅᖅᑐᑎᒃ ᐅᕝᕙᓘᓐᓃᑦ ᓂᕿᑲᓪᓚᑯᓗᒻᒥᑦ ᐃᒐᐅᑉ ᐃᓗᐊᓂ ᐆᑦᑐᒍ, ᐱᓕᕆᐊᕆᓯᒪᔭᖓᓐᓄᑦ ᐃᓚᓕᐅᔾᔨᔪᓂᑦ ᐅᑭᐅᖅᑕᖅᑐᒥ ᑐᖕᖓᓇᐅᓯᒃᑯᑦ.
ᕿᒥᕐᕈᐊᖅᑐᑎᒃ ᑲᔪᓯᔾᔪᑎᒋᓯᒪᔭᕐᒥᓂᒃ ᔭᐃᒍ ᐱᔨᑦᓯᕋᐅᑎᓕᕆᓂᖅ ᐊᒻᒪ ᐅᒥᖕᒪᒃ ᓛᑦᔾ, ᐅᐃᐅᓪᑳᒃᔅᑯᕐ ᖁᓚᕆᔭᖃᖏᓯᐊᖅᑑᒃ ᓯᕗᓂᑦᓴᖓᓂᑦ ᓇᖕᒥᓂᖁᑎᖏᑕ ᐊᒻᒪ ᐃᖃᓗᑦᑑᑦᑎᐊᑉ. ᑕᑯᓐᓇᖅᑑᒃ ᐊᖏᔪᐊᓗᒻᒥᑦ ᐊᔾᔨᖑᐊᒥᑦ ᖁᕕᐊᓇᖅᑎᓪᓗᒍ. ᐅᐃᐅᓪᕝ ᐅᖃᖅᑐᖅ ᐅᐱᒋᑦᑎᐊᖅᑐᒋᑦ ᒪᒃᑯᑦᑐᖁᑎᕗᑦ ᐊᒻᒪ ᖃᓄᐃᓕᐅᕈᑎᒋᕙᑦᑕᖏᑦ ᒪᓕᑦᑐᑎᒃ ᐅᖃᐅᔾᔪᐃᔾᔪᓯᖏᓐᓂᑦ ᐃᓇᑐᖃᐃᑦ, “ᖁᓚᕐᓇᖏᑦᑎᐊᖅᑐᖅ ᑲᒪᒋᔭᐅᑦᑎᐊᕐᓂᐊᕐᓂᕗᑦ ᒫᓐᓇᒃᑯᑦ ᐊᒻᒪ ᓯᕗᓂᑦᑎᓐᓂ. ᒪᒃᑯᑦᑐᐃᑦ ᖃᐅᔨᒪᑦᑎᐊᖅᑐᑦ ᖃᓄᖅ ᓈᓚᑦᑎᐊᕆᐊᖃᕐᓂᕐᒥᓂᒃ ᐊᒻᒪ ᓯᕗᓕᖅᑎᐅᓂᐊᖅᑐᑎᒃ ᐱᓕᕆᔾᔪᓯᕐᒥᓂᒃ ᐊᑐᖅᐸᓪᓗᑎᒃ ᑲᔪᓯᑎᑦᓯᑦᓯᐊᓂᒃᑯᑦ ᓴᖏᓂᖃᑦᑎᐊᖅᑐᒥᑦ ᖃᓄᖅ ᐱᕈᖅᐸᓪᓕᐊᒋᐊᖃᕐᓂᖏᓐᓄᑦ ᓄᓇᓕᕗᑦ ᐊᒻᒪ ᓄᓇᕘᑦ.”
ᐅᓇ ᓇᕿᓪᓗᒍ ᑕᑯᔪᒪᒍᕕᐅᒃ ᐅᖃᐅᓯᖃᖅᑐᑦ ᔭᐃᒍ ᐱᔨᑦᓯᕋᐅᑎᓕᕆᔩᑦ ᐅᒥᖕᒪᒃ ᓛᑦᔾᖁᑎᖓ ᐱᓪᓗᒍ ᐃᖃᓗᑦᑑᖅᑎᐊᒥᐅᑕᖅ, ᓄᓇᕘᒥ.