ᐳᖅᑐᔪᒥᑦ ᐱᓕᕆᔾᔪᑎᖃᕈᒪᓂᖅ ᖁᑦᓯᑦᑐᒥ ᐅᑭᐅᖅᑕᖅᑐᒥ
ᖃᖅᑲᐃᑦ ᐊᒻᒪ ᐃᓐᓈᕈᐃᑦ ᐊᕙᓗᐊᓃᑦᑐᑦ ᐃᑉᐱᐊᕐᔫᑉ, ᐊᖏᔫᖏᑦᑐᖅ ᕼᐋᒻᒪᓚᐅᓗᓂ ᐅᐊᓐᓇᖅᐸᓯᐊᓃᑦᑐᓂ ᕿᑭᖅᑖᓘᑉ. ᖁᑦᓯᑦᑐᒥᐅᑕᐃᑦ ᑎᖕᒥᐊᑦ ᐱᑭᐅᖃᖅᐸᑦᑐᑦ ᐃᓐᓈᕈᕐᓂ, ᐊᒻᒪ ᐊᓪᓚᖕᖑᐊᑦ ᕿᓚᓗᒐᐃᑦ ᐊᒻᒪ ᐊᕝᕖᑦ ᑕᑉᐸᐅᓈᖅᐸᑦᑐᑦ ᐊᕐᕌᒍᑕᒫᖅ. ᓯᓚᑎᑦᓯᐊᖓᓂ ᓄᓇᓕᐅᑉ ᓄᓇᑕᖃᖅᑐᖅ ᑕᐃᔭᐅᔪᒥᑦ ᐊᖅᕙᕐᑑᖅ, ᒧᓯᓯ ᐆᔪᑯᓘᑉ ᐃᓚᖏᑦ ᑕᐃᑲᓂ ᐅᐱᕐᖏᕙᓚᐅᖅᑐᑦ ᐱᕈᖅᐸᓪᓕᐊᑎᓪᓗᒍ. ᓄᓕᐊᕐᒥᓂᒃ ᔨᐴᕋᒥᑦ ᐊᐃᑉᐸᖃᖅᑐᓂ ᓴᖅᑮᔪᒪᓕᓚᐅᕐᓯᒪᔫᒃ ᓇᖕᒥᓂᕐᒥᓂᒃ, ᐊᑦᑎᖅᑐᒍ ᑕᐃᑦᓱᒥᖓ ᓄᓇᐅᕙᓚᐅᖅᑐᒥᑦ ᖁᕕᐊᒋᓯᒪᔭᖏᓐᓂᑦ ᐃᓅᓯᖏᑎᒍᑦ ᐃᖅᑲᐅᒪᔾᔪᑎᒋᔭᒥᓂᒃ. 1993−ᖑᑎᓪᓗᒍ, ᑖᒃᑯᐊ ᐊᐃᑉᐹᕇᒃ ᓴᖅᑮᓚᐅᖅᑑᒃ ᐊᖅᕙᕐᑑᖅ ᐱᔨᑦᓯᕋᐅᑎᓕᕆᓂᕐᒥᑦ ᓕᒥᑕᑦ, ᑖᑦᓯᓕᕆᔨᐅᓗᑎᒃ ᐃᓄᑦᑕᐅᑎᒥᑦ, ᓇᓪᓕᐊᓐᓄᕋᖅᑎᑦᓯᕙᑦᑐᑎᒃ ᑭᒃᑯᑐᐃᓐᓇᕐᓂᒃ ᐃᑉᐱᐊᕐᔪᒻᒧᑦ ᐊᒻᒪ ᓇᓂᓯᕕᒻᒧᑦ, ᖃᓂᒋᔭᖓᓃᑦᑐᖅ ᑕᐅᓐᖑᔪᖅ ᓴᖅᑭᖅᑎᑕᐅᓚᐅᕐᓂᑯ ᐅᔭᕋᕐᓂᐊᕐᕕᖃᓕᕐᒪᑦ ᐊᔾᔨᖓᓂᑦ ᐊᑦᑎᖅᑕᐅᓯᒪᔪᒥᑦ. ᓇᖕᒥᓂᖁᑎᐅᔪᖅ ᓯᕗᒧᐊᑉᐸᓪᓕᐊᑎᓪᓗᒍ, ᐊᖅᕙᕐᑑᖅ ᐹᓯᑖᓕᓚᐅᖅᑐᑦ ᐃᖅᑲᓇᐃᔭᖅᑎᓂᑦ ᐅᔭᕋᕐᓂᐊᕕᒻᒨᕈᔾᔨᕙᑦᑐᒥᑦ, ᑖᑦᓯᖁᑎᖏᑦ ᐃᓄᑦᑕᐅᑏᑦ ᓄᓇᓕᓐᓂ ᐱᔨᑦᓯᕋᖅᑎᓪᓗᒍ ᐊᒻᒪᑦᑕᐅᖅ ᐃᖅᑲᓇᐃᔭᖅᑎᓄᑦ. ᐱᕕᖃᐅᑎᑦᓴᑦ ᓴᖅᑭᐸᓪᓕᐊᓂᖏᓐᓄᑦ, ᑲᒻᐸᓂᖁᑎᐅᔪᖅ ᓯᐊᒻᒪᐸᓪᓕᐊᓕᓚᐅᖅᑐᖅ, ᐃᓚᓯᓪᓗᑎᒃ ᓴᓇᓂᒃᑯᑦ ᑲᒻᐸᓂᒥᑦ ᐊᒻᒪ ᑐᔪᕐᒥᕕᒻᒥᑦ. ᐊᕐᕌᒍᐃᑦ ᐊᓂᒍᖅᐸᓪᓕᐊᑎᓪᓗᒋᑦ, 100−ᖑᓗᐊᓂᑦ ᐃᖅᑲᓇᐃᔭᖅᑎᒋᓯᒪᔭᕐᒥᓂᒃ ᓈᓴᐃᓯᒪᓕᖅᑐᑦ, ᐃᓘᓐᓇᐸᓗᑎᒃ ᓄᓇᓕᓐᓃᖔᕐᓯᒪᓪᓗᑎᒃ. ᐃᓚᖓᑦ ᐊᑦᓱᕉᑎᐅᕙᓚᐅᖅᑐᖅ ᐃᖅᑲᓇᐃᔭᖅᑎᑖᕋᓱᓐᓂᒃᑯᑦ ᐱᓕᒻᒪᓴᕐᓯᒪᑦᑎᐊᖅᑐᓂᑦ, ᑲᒻᐸᓂᖁᑎᒃᑯᑦ ᓯᓚᑖᓂᑦ ᓄᓇᓕᐅᑉ ᑳᓐᑐᕌᑎᒍᑦ ᐱᓕᕆᔨᑖᕆᐊᖃᓚᐅᖅᐸᑦᑐᑦ ᐃᓚᖏᓐᓄᑦ ᐱᓕᕆᐊᑦᓴᓄᑦ. ᐃᑉᐱᐊᕐᔪᒃ ᓄᓇᓕᐅᓗᓂ ᐅᖓᓯᑦᓴᖅᑐᓂ ᐊᓯᖏᓐᓂᑦ ᓄᓇᓕᓐᓂᑦ, ᓇᖕᒥᓂᖃᕐᕕᒋᔭᕆᐊᖓ ᐱᔭᕆᐊᑭᑦᓯᒪᖏᑦᑐᕈᓗᒃ. ᓇᓂᓯᕕᒃ ᐅᔭᕋᕐᓂᐊᕐᕕᒃ, ᐊᐅᓚᑕᐅᓕᖅᑐᖅ 1976−ᒥᓂᒃ, ᒪᑐᔭᐅᓚᐅᖅᑐᖅ 2002−ᒥ, ᐊᒻᒪ ᓄᓇᓕᑦᑕᖓ ᕿᒪᑦᑕᐅᓯᒪᓕᖅᑐᓂ. ᑐᔪᕐᒥᕕᖓ ᑕᑯᖏᓂᕐᓴᐅᕙᑦᑐᖅ ᓂᐅᕐᕈᓯᒪᔪᓂᑦ ᐅᑭᐅᒃᑯᑦ ᐃᑉᐱᐊᕐᔪᒻᒧᑦ ᐳᓚᕋᑦᑏᑦ ᐅᐸᖏᓂᕐᓴᐅᕙᓕᖅᑎᓪᓗᒋᑦ.
ᐱᒐᓗᐊᖅᑎᓪᓗᒋᑦ ᐊᕝᕕᐊᕈᑎᐅᓚᐅᖅᑐᑦ, ᐊᖅᕙᕐᑑᖅ ᓯᕗᒧᐊᑦᓯᐊᕐᓯᒪᔪᖅ. 2005−ᒥ, ᑲᒻᐸᓂᖁᑎᐅᔪᖅ ᐱᓕᕆᒋᐊᖃᑎᖃᓕᓚᐅᖅᑐᑦ ᐊᑐᖅᑐᐊᕐᕕᒃ ᑎᒥᖁᑎᖓᓐᓂᑦ, ᐊᑐᐃᓐᓇᕈᐃᓚᐅᖅᑐᓂᑦ ᑮᓇᐅᔭᓂᑦ ᐊᒻᒪ ᐅᖃᐅᔾᔪᐃᒋᐊᕈᑎᓂᑦ ᐱᓕᕆᔾᔪᑎᓂᑦ. “ᐊᖅᕙᕐᑑᖅ ᐊᖑᒻᒪᑎᓯᒪᑦᑎᐊᖅᐸᓚᐅᖅᑐᑦ ᐅᓂᒃᑳᓕᐅᕆᐊᖃᓕᕋᐃᒐᒥᒃ, ᖁᕕᐊᓱᑉᐸᑦᑐᑎᒃ ᐊᒻᒪ ᑐᓴᐅᒪᖃᑎᖃᑦᑎᐊᐸᑦᑐᑎᒃ ᐅᕙᑦᑎᓐᓂᒃ,” ᐅᖃᖅᑐᖅ ᕆᐊᓇ ᓴᑏᓇ, ᐊᐅᓚᑦᑎᔾᔪᑎᓂᑦ ᑲᒪᔨ ᐊᑐᖅᑐᐊᕐᕕᒻᒥ. “ᐅᕙᑦᑎᓐᓅᕆᐊᑦᓴᖅ ᑲᑉᐱᐊᓱᑉᐸᖏᑦᑐᑦ ᐅᖃᐅᔾᔪᐃᒋᐊᕈᑎᓂᑦ ᑐᓴᕆᐊᖅᑐᖅᑐᑎᒃ ᐊᒻᒪ ᖁᕕᐊᒋᑦᑎᐊᖅᑕᕋ ᒧᓯᓯᐅᑉ ᓇᖕᒥᓂᓕᕆᓂᕐᒥᑦ ᖃᐅᔨᒪᔭᖏᓐᓂᑦ ᐊᒻᒪ ᐃᓕᑕᕐᓯᔪᓐᓇᕐᓂᖓᓂᑦ ᐱᕕᖃᐅᑎᐅᔪᓐᓇᖅᑐᒥᑦ ᐃᑲᔫᑎᒃᑯᑦ.” 2010−ᒥ, ᐆᔪᑯᓗᒃᑯᑦ ᖃᐅᔨᓚᐅᕋᒥᒃ ᐱᕕᖃᐅᑎᒋᔪᓐᓇᖅᑕᒥᓂᒃ ᓱᓕ ᐊᒻᒪ ᐊᖏᓪᓕᒋᐊᕆᓕᖅᑐᑎᒃ ᑐᔪᕐᒥᕕᖁᑎᒥᓂᒃ, ᑕᖕᒫᕐᕕᒃ ᐃᓐ, ᐃᓚᓪᓗᒍ ᓯᓂᑦᑕᕕᒻᒥᑦ ᐊᒻᒪ ᐅᓪᓛᕈᒻᒥᑕᕐᕕᒻᒥᑦ. ᐱᒻᒪᕆᐅᓚᐅᖅᑐᖅ ᓯᕗᒧᐊᒍᑎᐅᓗᓂ ᑲᒻᐸᓂᖁᑎᖓᓐᓄᑦ, ᓂᐅᕐᕈᕙᑦᑐᓄᑦ ᐃᑉᐱᐊᕐᔪᒻᒧᑦ ᓴᖅᑮᔪᓐᓇᓯᓪᓗᑎᒃ ᓇᓖᕌᕈᑎᑦᓴᑲᓐᓂᕐᓂᒃ. ᓄᑖᒥᑦ ᐋᓐᓂᐊᓯᐅᖅᑎᓄᑦ ᐱᓕᕆᕝᕕᑦᓴᒥᑦ ᓴᓇᔪᖃᖅᐸᓪᓕᐊᑎᓪᓗᒍ ᓄᓇᓕᓐᓂ, ᑐᔪᕐᒥᕕᐅᔪᖅ ᑕᑕᐃᓐᓇᕈᔪᑉᐸᓕᖅᑐᖅ. ᐊᐱᕆᔭᐅᒍᑎᒃ ᐆᔪᑯᓗᒃᑯᑦ, ᑲᔪᓯᑦᓯᐊᕐᓂᐅᔪᖅ ᓇᖕᒥᓂᖃᕐᓂᒃᑯᑦ ᑐᖕᖓᕕᖃᓗᐊᕈᓐᓇᖅᑐᑦ ᐱᓕᕆᖃᑎᒌᒍᑎᒋᕙᑦᑕᖏᓐᓂᑦ ᐃᕝᕕᑦ. “ᐱᓕᕆᖃᑕᐅᕙᒋᑦᓯ ᓄᓇᓕᑦᓯᓐᓂ,” ᐅᖃᐅᔾᔪᐃᕙᑦᑐᑦ ᐊᓯᖏᓐᓂᑦ ᐅᑭᐅᖅᑕᖅᑐᒥ ᓇᖕᒥᓂᖃᖅᑎᓂᑦ, “ᐃᑲᔪᕐᓱᖅᑕᐅᕙᓪᓗᑎᒃ ᓄᓇᓕᕐᒥᐅᑕᓂᑦ ᐱᒻᒪᕆᐊᓘᔪᖅ ᐊᑑᑎᖃᕐᓂᒃᑯᑦ ᑲᔪᓯᑦᓯᐊᓂᕐᓄᑦ.”
ᐅᓇ ᓇᕿᖁᔪᖅ ᑕᑯᔪᒪᒍᕕᐅᒃ ᓈᒻᒪᔪᖅ ᐅᓂᒃᑳᓕᐊᖑᓯᒪᔪᖅ ᐅᑯᓇᖕᖓᑦ ᐅᖄᓕᒫᒐᓕᐅᖅᑎᓂᑦ ᖁᑦᑎᑦᑐᒥ ᐅᖃᓕᒫᒐᖅ (Up Here Magazine).