Main Content

ᐲᑕᐅᑉ ᐃᒃᔅᐱᑕᐃᑎᖕ

Worker Next to Truck

ᐃᓄᖕᒧᑦ ᓇᖕᒥᓂᖁᑎᐅᔪᖅ

ᓯᕗᓂᖓ ᖃᐅᒪᑦᑎᐊᖅᑐᖅ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᒃᑯᓐᓄᑦ. ᐃᓄᖕᓄᑦ ᓇᖕᒥᓂᖁᑎᐅᔪᑦ ᓄᓇᕘᒥ ᐱᒻᒪᕆᐅᔪᒃᑯᑦ ᐊᑑᑎᖃᖅᐸᑦᑐᑦ ᓄᓇᓕᓐᓂ ᐊᒻᒪ ᓄᓇᕘᒥ ᑮᓇᐅᔭᓕᕆᔾᔪᑎᓂ. ᑐᓂᕐᕈᑎᖃᖅᐸᑦᑐᑦ ᐃᖅᑲᓇᐃᔭᖅᑎᖃᖅᐸᑦᑐᑎᒃ ᓄᓇᓕᕐᒥᐅᑕᓂᑦ ᐊᒻᒪ ᐊᑐᐃᓐᓇᐅᑎᑦᓯᓪᓗᑎᒃ ᑭᖕᖒᒪᔭᒐᐅᓪᓚᕆᑦᑐᓂᑦ ᐱᔨᑦᓯᕋᐅᑎᓂᑦ. ᐊᑕᐅᓯᖅ ᐆᑦᑑᑎᐅᔪᓐᓇᖅᑐᖅ ᑲᔪᓯᓯᒪᑦᑎᐊᖅᑐᒥᑦ ᐃᓄᖕᒧᑦ ᓇᖕᒥᓂᕆᔭᐅᔪᒥᑦ ᐱᐅᔪᒃᑯᑦ ᐊᑦᑐᐃᓯᒪᓪᓗᑎᒃ ᐅᑯᐊ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ (PEL).

ᐊᐅᓚᑕᐅᓗᓂ ᖃᒪᓂ’ᑐᐊᕐᒥ, ᓄᓇᕗᑦ, ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᓇᓪᓕᐅᓂᕐᓯᐅᓛᓕᖅᑐᑦ ᐊᕐᕌᒍᓂᑦ ᐊᕙᑎᓂᑦ ᓴᖅᑭᔮᕐᓯᒪᓕᕐᓂᕐᒥᓂᒃ ᐊᕐᕌᒎᓛᖅᑐᖅ. ᑕᒪᓐᓇ ᐱᔭᕇᕈᑎᒻᒪᕆᐅᔪᖅ ᐃᓕᑕᕆᔭᐅᒋᐊᖃᖅᑐᓂ. ᓯᕗᓕᖅᑎᐅᓗᑎᒃ ᐲᑕ ᑖᐸᑕᐃ ᐊᒻᒪ ᕗᕋᐃᓐᒃ ᑑᑑ, ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᐊᓂᒍᐃᓯᒪᑦᑎᐊᖅᑐᑦ ᐊᑦᓱᕉᑎᐅᔪᓐᓇᖅᑐᓂᑦ ᓇᖕᒥᓂᖃᕐᓂᒃᑯᑦ ᐅᑭᐅᖅᑕᖅᑐᒥ. ᐱᕈᐃᓯᒪᓕᖅᑐᑦ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᑲᒻᐸᓂᐅᓕᖅᑐᓂ ᐊᑐᐃᓐᓇᖃᖅᐸᑦᑐᓂ ᐱᓇᓱᐊᖅᑕᐅᔪᓐᓇᓯᐊᖅᑐᑎᒃ ᐱᓕᕆᔾᔪᑎᓕᕆᓂᕐᒥᑦ ᐱᔨᑦᓯᕋᐅᑎᓂᑦ ᐃᑲᔫᑎᑦᓴᓂᑦ ᐱᓕᕆᔾᔪᑎᒍᑦ ᐱᕙᓪᓕᐊᑎᑦᑎᓂᒃᑯᑦ, ᐃᖏᕐᕋᔪᓕᕆᓂᒃᑯᑦ ᐊᒻᒪ ᐊᓯᖏᒍᑦ ᓴᓇᓂᒃᑯᑦ ᐱᓕᕆᔾᔪᑎᓂᑦ ᐊᐅᓚᑕᐅᔪᒥᑦ ᑭᕙᓪᓕᐅᑉ ᓄᓇᓕᖃᕐᕕᖓᓐᓂ. ᐊᐅᓚᑉᐸᑦᑕᖏᓐᓄᑦ ᐃᓚᒋᔭᐅᔪᑦ ᐅᒥᐊᕐᔪᐊᓂᑦ ᓂᐅᕋᖅᑕᐅᔪᓂᑦ ᐱᓕᕆᐊᖃᕐᓂᖅ, ᓂᐅᕋᐃᕙᑦᑐᑕ ᐅᒥᐊᕐᔪᐊᑦ ᐅᓯᔭᖏᓐᓂᑦ, ᐃᖅᑲᓇᐃᔭᖅᑎᓂᑦ ᐅᔭᕋᕐᓂᐊᕐᕕᖏᓐᓅᐸᑦᑐᒋᑦ ᐊᒻᒪ ᓄᓇᒥ ᐱᓕᕆᔾᔪᑎᒍᑦ ᐱᔨᑦᓯᕋᐅᑎᖃᖅᐸᑦᑐᑕ ᖃᒪᓂ’ᑐᐊᖅ ᖃᖓᑕᓲᒃᑯᕕᖓᓐᓂ.

ᐃᑉᐱᓇᖅᑐᑦ ᑖᐸᑕᐃ ᐊᒻᒪ ᑑᑑ ᓈᒻᒪᒋᔭᖃᕐᓂᖏᓐᓂᑦ ᐊᒻᒪ ᐱᓕᕆᐊᖃᕈᒪᑦᑎᐊᕐᓂᖏᓐᓂᑦ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᓴᖅᑭᕐᓯᒪᓕᖅᑕᖏᓐᓂᑦ ᐅᖃᖃᑎᒋᓪᓗᒋᒃ.

“ᓯᕗᓪᓕᕐᒥ ᐱᒋᐊᖅᐸᓪᓕᐊᓕᕋᑦᑎᒍ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ, ᖃᐅᔨᒪᓚᐅᖏᓯᐊᖅᑐᒍᒃ ᖃᓄᑎᒋ ᐃᓅᓯᕗᒃ ᐊᓯᔾᔨᕋᔭᕐᒪᖔᑎᒃ ᐅᕝᕙᓘᓐᓃᑦ ᖃᓄᑎᒋ ᐱᓕᕆᒋᐊᖃᕐᓂᐊᕐᓂᑎᓐᓂᒃ ᐱᕈᐃᕙᓪᓕᐊᒍᒪᓂᐊᕐᓗᓂ ᑲᔪᓯᓂᖃᑦᑎᐊᖅᑐᒥᑦ ᓇᖕᒥᓂᕆᔭᒥᑦ. ᐱᐅᓕᔭᐅᓯᒪᑦᑎᐊᓚᐅᖅᑐᒍᒃ ᐃᑲᔪᖅᑎᖃᕈᓐᓇᕆᐊᑦᓴᖅ ᐱᔨᑦᓯᕋᐅᑎᒋᔭᑦᑎᓐᓂᑦ ᓲᕐᓗ ᐊᓃᑯ ᐄᒍᓪ ᐅᔭᕋᕐᓂᐊᖅᑏᑦ, ᓄᓇᕗᑦ ᐅᒥᐊᕐᔪᐊᓕᕆᔨᓂᑦ ᐊᒻᒪ ᓱᓇᒃᑯᑖᓕᕆᔨᓂᑦ, ᑳᒻ ᐃᐅᕐᑯᓐᓂᑦ ᖃᖓᑕᓲᓕᕆᔨᓂᑦ ᐊᒻᒪ ᐊᓯᖏᓐᓂᑦ. ᐱᐅᓕᔭᐅᓯᒪᓪᓚᕆᓚᐅᖅᑐᒍᑦ ᑮᓇᐅᔭᑎᒍᑦ ᐃᑲᔪᖅᑎᑕᕈᓐᓇᓂᕐᒥᑦ ᑲᒻᐸᓂᐅᔪᒥᑦ ᓲᕐᓗ ᐊᑐᖅᑐᐊᕐᕕᒃ ᑎᒥᖁᑎᖏᓐᓂᑦ ᐅᕙᑦᑎᓐᓂᑦ ᑮᓇᐅᔭᖃᖅᑎᑦᓯᒍᓐᓇᓚᐅᕐᒪᑕ ᐱᕈᐃᕙᓪᓕᐊᑎᓪᓗᑕ ᐱᓕᕆᐊᒃᑯᑦ. ᐱᓕᕆᖃᑎᒋᓯᒪᓕᖅᑕᕗᑦ ᐊᑐᖅᑐᐊᕐᕕᒃᑯᑦ 2003−ᒥᓂᒃ ᐊᒻᒪ ᐅᕙᑦᑎᓐᓂᒃ ᐃᑲᔪᕐᓯᒪᓕᖅᑐᑦ ᐊᖏᔪᐊᓗᒻᒥᑦ. ᐱᓕᕆᔨᖃᑦᑎᐊᕐᒥᔪᒍᑦ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᐱᓕᕆᕝᕕᖓᓂ ᐊᒻᒪ ᐅᐱᒋᑦᑎᐊᖅᑐᒍ ᐅᖃᕈᓐᓇᖅᑐᒍᑦ ᐱᓕᕆᔨᓄᑦ ᐃᓄᐃᓐᓇᑦᑎᐊᖑᒻᒪᑕ 100%,” ᑖᐸᑕᐃ ᐅᖃᖅᑐᖅ.

ᑑᑑ ᐅᖃᕆᓪᓗᓂ, “ᐃᓱᒪᒋᔭᕗᑦ ᑖᑦᓱᒥᖓᑦᑎᐊᕙᒃ ᐱᓕᕆᔾᔪᑎᖃᓚᐅᕐᓂᑎᓐᓂᑦ. ᑕᐃᒪᖕᖓᓕᒫᖅ ᐃᓄᐃᓐᓇᐅᓯᒪᔪᒍᑦ ᓇᖕᒥᓂᖃᖅᑎᐅᓗᑕ ᐊᒻᒪ ᑐᑭᓯᓚᐅᖅᑐᑕ ᕿᓚᒥᒃᑯᑦ ᐱᓕᕆᔨᖃᕆᐊᖃᕐᓂᑎᓐᓂᑦ ᓴᓇᓂᕐᒥᑦ ᐊᒻᒪ ᐸᐃᑉᐹᓕᕆᓂᕐᒥᑦ ᖃᐅᔨᒪᑦᑎᐊᖅᑐᓂᑦ, ᑲᑐᔾᔨᖃᑎᖃᓕᓚᐅᖅᑐᒍᑦ ᐳᕋᐃᑕᓐ−ᐴᕐᕆ ᐃᒃᔅᐱᑕᐃᑎᖕᑯᓐᓂᑦ ᐋᖅᑭᑦᓱᓕᕋᑦᑎᒍᑦ ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ. ᐊᕐᕌᒍᐃᑦ 19 ᐊᓂᒍᓕᖅᑎᓪᓗᒋᑦ, ᐅᐱᒍᓱᑦᑎᐊᖅᑐᑕ ᐅᖃᕈᓐᓇᖅᑐᒍᑦ ᐊᐅᓚᑦᑎᕙᓐᓂᑎᓐᓂᑦ ᐃᓘᓐᓇᖏᓐᓂᑦ ᓇᖕᒥᓂᕆᔭᑦᑎᓐᓂ ᐱᓕᕆᔾᔪᑎᖏᓐᓂᑦ ᐅᕙᑦᑎᒍᑦ, ᐊᒻᒪ ᑕᐃᒪᐃᒻᒪᑦ, ᓂᐅᕕᐊᕆᔭᐃᓐᓇᕈᓐᓇᓕᓚᐅᖅᑕᕗᑦ ᐳᕋᐃᑕᓐ−ᐴᕐᕆ ᐃᒃᔅᐱᑕᐃᑎᖕᑯᑦ ᓇᖕᒥᓂᖃᐅᑎᖏᑦ ᐅᕙᑦᑎᓐᓂᑦ ᑕᖅᑭᐅᓚᐅᖅᑐᒥ ᐃᑲᔪᖅᑎᒋᓪᓗᒋᑦ ᐊᑐᖅᑐᐊᕐᕕᒃ ᑎᒥᖁᑎᖓᑦ. ᓇᑯᕆᑦᑎᐊᖅᑕᕗᑦ ᐳᕋᐃᑕᓐ−ᐴᕐᕆ ᐃᒃᔅᐱᑕᐃᑎᖕ ᖃᓄᐃᓕᐅᕆᐊᖃᕐᓂᑎᓐᓂᑦ ᐅᖃᐅᔾᔪᐃᔪᓐᓇᓚᐅᕐᒪᑕ ᐊᒻᒪ ᐃᑲᔪᕐᓱᐃᕙᑦᑐᑎᒃ ᐊᕐᕌᒍᓂ ᐊᒻᒪ ᐅᕙᑦᑎᓐᓂᑦ ᐃᑲᔪᓚᐅᕐᓂᖏᓐᓂᑦ ᓴᖅᑮᓇᓱᐊᖅᑎᓪᓗᑕ ᑲᔪᓯᑦᑎᐊᕐᓯᒪᔪᒥᑦ ᑭᕙᓪᓕᕐᒥ ᐱᓕᕆᔨᑦᓴᓕᕆᓂᒃᑯᑦ ᓇᖕᒥᓂᖃᐅᑎᒥᑦ. ᑲᒻᐸᓂᐅᔪᑦ ᐱᑎᓪᓗᒋᑦ ᓲᕐᓗ ᑳᓪᒻ ᐃᐅᕐ ᖃᖓᑕᓲᓕᕆᔨᐅᔪᑦ ᐊᒻᒪ ᐊᒡᓃᑯ ᐄᒍᓪ ᐅᔭᕋᓐᓂᐊᖅᑏᑦ, ᐊᒻᒪ ᐅᔭᕋᓐᓂᐊᖅᑏᐅᔪᑦ ᓇᒥᑐᐃᓐᓇᖅ, ᐱᓕᕆᖃᑎᖃᖅᐸᓐᓂᖏᓐᓂᑦ ᐃᓄᖕᓄᑦ ᐱᓕᕆᕝᕕᓐᓂᑦ ᓄᓇᕘᒥ, ᖁᓚᖏᑎᐊᖅᑐᒍᑦ ᓯᕗᓂᕗᑦ ᖃᐅᒪᑦᑎᐊᕐᓂᐊᕐᓂᖓᓄᑦ. ᓂᕆᐅᒋᔭᖃᑦᑎᐊᖅᑐᒍᑦ ᓯᕗᓂᑦᓴᑎᓐᓂᑦ 100% ᐃᓄᖕᓄᑦ ᓇᖕᒥᓂᕆᔭᐅᑎᓪᓗᒍ.”

ᐲᑕᐅᑉ ᐃᒃᔅᐱᑕᐃᑎᖕ ᓕᒥᑕᑦ ᐆᑦᑑᑎᑦᑎᐊᕚᓘᕗᑦ ᖃᓄᖅ ᐱᓕᕆᖃᑎᒌᑉᐸᓐᓂᖅ ᑲᑐᔾᔨᖃᑎᒌᓐᓂᒃᑯᑦ ᐃᖅᑲᓇᐃᔭᖅᑎᓂᑦ, ᐱᔨᑦᓯᕋᐅᑎᐅᔪᓂᑦ, ᐱᓕᕆᐊᓄᑦ ᐱᓕᕆᖃᑕᐅᕙᑦᑐᓂᑦ ᐊᒻᒪ ᐊᓯᖏᓐᓂᑦ ᑐᓴᐅᒪᒍᒪᕙᑦᑐᓂᑦ ᐃᑲᔪᖃᑎᒌᒍᓐᓇᕐᓂᖏᓐᓂᑦ ᑲᔪᓯᓂᖃᑦᑎᐊᖅᑐᓂᑦ ᐃᓄᖕᓄᑦ ᓇᖕᒥᓂᖃᐅᑎᓂᑦ ᓄᓇᕘᒥ.

ᐅᓇ ᓇᕿᖁᔪᖅ ᕿᒥᕐᕈᐊᕈᒪᒍᑦᓯᐅᒃ ᓈᒻᒪᔪᖅ ᐅᓂᒃᑳᑦᓴᖅ!