ᔪᓚᐃ 2022 - ᐃᓕᑕᕆᔭᐅᓗᑎᒃ ᐊᒻᒪ ᐃᑲᔪᕐᓱᖅᑕᐅᓗᑎᒃ ᓄᓇᕘᒥᐅᑕᐃᑦ ᐃᓄᐃᑦ ᐃᓕᓐᓂᐊᖅᑏᑦ ᓯᓚᑦᑐᓴᕐᕕᒻᒥ ᓯᓚᑦᑐᓴᕐᕕᔾᔪᐊᕐᕕᒻᒥᓘᓐᓃᑦ, ᐊᑐᖅᑐᐊᕐᕕᒃ ᑎᒥᖁᑎᖓᑦ ᖁᕕᐊᒋᑦᑎᐊᖅᑐᒋᑦ ᐊᑐᐃᓐᓇᖃᕈᓐᓇᓛᓕᖅᑐᑦ ᑕᓪᓕᒪᓂᑦ (5) ᐃᓕᓐᓂᐊᕈᑎᓄᑦ ᐃᑲᔫᑎᑦᓴᓂᑦ 2022−ᒥ!
ᐅᑯᓂᖓ:
ᐊᑐᖅᑐᐊᕐᕕᒃ ᑎᒥᖁᑎᖓ 20−ᓂᒃ ᐊᕐᕌᒍᓂᒃ ᓇᓪᓕᐅᓪᓕᖅᓯᐅᕐᓂᕐᒧᑦ ᐃᓕᓐᓂᐊᕈᑎᒃᓴᖅᑖᑦ
(ᒪᕐᕉᒃ ᐃᓕᓐᓂᐊᕈᑎᒃᓴᖅᑖᑦ ᐊᑭᖃᖅᑐᑦ $2500 ᐊᑐᓂ)
ᔮᓐ ᕼᐃᒃᔅ ᓇᖕᒥᓂᖃᖅᑎᓂᑦ ᐃᓕᓐᓂᐊᕈᑎᒃᓴᖅᑖᑦ
(ᐊᑕᐅᓯᖅ ᐃᓕᓐᓂᐊᕈᑎᒃᓴᖅᑖᑦ ᐊᑭᖃᖅᑐᑦ $5000 ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑎᓪᓗᖏᑦ ᓇᖕᒥᓂᖃᖅᑐᓕᕆᓂᕐᒥᒃ)
ᓄᓇᕗᑦ ᓯᕗᓂᒃᓴᕗᒻᒥ ᐃᓕᓐᓂᐊᓚᐅᖅᓯᒪᔪᓄᑦ ᐃᓕᓐᓂᐊᕈᑎᒃᓴᖅᑖᑦ
(ᒪᕐᕉᒃ ᐃᓕᓐᓂᐊᕈᑎᒃᓴᖅᑖᑦ ᓄᓇᕗᑦ ᓯᕗᓂᒃᓴᕗᒻᒥ ᐃᓕᓐᓂᐊᕌᓂᒃᑐᓄᑦ ᐊᑭᖃᖅᑐᑦ $2500 ᐊᑐᓂ)
ᐱᔾᔪᑎᐅᔪᑦ ᐃᓕᓐᓂᐊᕈᑎᓄᑦ ᐃᑲᔫᑎᑦᓴᑦ ᑮᓇᐅᔭᑎᒍᑦ ᐃᑲᔪᖅᑕᐅᒍᒪᓪᓗᑎᒃ ᖃᐅᑕᒫᖅ ᐃᓕᓐᓂᐊᐸᑦᑐᓄᑦ ᐱᒋᐊᖅᐸᓪᓕᐊᓕᖅᑎᓪᓗᒋᑦ ᐅᕝᕙᓘᓐᓃᑦ ᐱᔭᕇᖅᐸᓪᓕᐊᓕᖅᑎᓪᓗᒋᑦ ᐃᓕᓐᓂᐊᕈᑎᒥᓂᒃ. ᐊᑐᖅᑐᐊᕐᕕᒃ ᑎᒥᖁᑎᖓᑦ ᐅᑉᐱᕈᓲᑎᖃᑦᑎᐊᕐᒪᑕ ᐱᓕᕆᔾᔪᑎᖃᖅᐸᓐᓂᐅᔪᖅ ᐃᓕᓐᓂᐊᕈᑎᖏᓐᓄᑦ ᓄᓇᕘᒥ ᐃᓕᓐᓂᐊᖅᑎᖁᑎᑦᑎᓐᓅᖓᔪᓂᑦ ᐊᒻᒪ ᓂᕆᐅᒋᔭᖃᕐᓂᐊᖅᑐᑎᒃ ᑐᑦᓯᕋᐅᑎᓕᐅᖃᑦᑕᓂᐊᕐᓂᖏᓐᓂᑦ ᐃᓕᓐᓂᐊᖅᑏᑦ ᐊᕐᕌᒍᑦᑎᓐᓂ ᐃᓕᓐᓂᐊᕈᑎᓄᑦ ᐃᑲᔫᑎᑦᓴᓂᑦ! ᑐᑦᓯᕋᐅᑎᓕᐅᕈᒪᓐᓂᕈᕕᑦ ᐃᓕᓐᓂᐊᕈᑎᓄᑦ ᐃᑲᔫᑎᑦᓴᓂᑦ, ᑕᑕᑎᕈᓐᓇᖅᑕᐃᑦ ᑎᑎᕋᕐᕕᑦᓴᖅ ᖃᕋᑕᐅᔭᒃᑯᑦ ᐅᕙᖕᖓᑦ ᐱᔭᑦᓴᖅ https://atuqtuarvik.com/en/scholarship-application. ᐃᓱᒪᓐᓂᕈᕕᑦ ᐊᑕᐅᓯᐅᓗᐊᒥᑦ ᐱᓇᓱᐊᕈᓐᓇᓂᕐᓂᒃ ᐃᓕᓐᓂᐊᕈᑎᓄᑦ ᐃᑲᔫᑎᑦᓴᓂᑦ, ᑐᑦᓯᕋᖁᔪᐊᓗᒃ ᐊᑕᐅᓯᐅᓗᐊᒥᑦ. ᖃᕋᑕᐅᔭᒃᑯᑦ ᑎᑎᕋᕐᕕᑦᓴᖅ ᓄᑖᖑᔪᖅ ᐃᑭᐊᖅᑭᕕᑦᑎᓐᓅᖅᑕᐅᕋᑖᓚᐅᖅᑐᓂ ᐊᒻᒪ ᐱᔭᕆᐊᑭᓪᓕᑎᑦᓯᔾᔪᑎᐅᓇᓱᐊᖅᑐᓂ ᐃᓕᓐᓂᐊᖅᑎᓄᑦ ᐅᐸᑦᑕᐅᔪᓐᓇᖁᓪᓗᒍ ᐊᒻᒪ ᐊᑐᖅᑕᐅᔪᓐᓇᕐᓗᓂ. ᖃᓄᖅ ᐃᓱᒪᒋᔭᑎᑦ ᑕᒪᓐᓇ ᐱᓪᓗᒍ ᑐᖕᖓᓱᑦᑎᐊᖅᑐᑦ.
ᓇᕿᑦᑎᒍᓐᓇᕐᒥᔪᑎᑦ ᐅᐃᒍᖃᕐᕕᖏᓐᓂᑦ ᑕᕝᕙᓃᑦᑐᓂᑦ ᐱᔪᒪᒍᕕᒋᑦ ᖃᕋᑕᐅᔭᒃᑯᑦ ᑎᑎᕋᕐᕕᐅᔪᓐᓇᖅᑐᑎᑦ ᑎᑎᕋᕐᕕᑦᓴᖅ:
https://atuqtuarvik.com/en/20th-anniversary-scholarship-application-package
https://atuqtuarvik.com/en/nunavut-sivuniksavut-scholarship-application-package
https://atuqtuarvik.com/en/john-hickes-business-scholarship-application-package
ᐅᓪᓗᕐᓯᐅᑎᒍᑦ ᐃᓱᓕᕝᕕᑦᓴᖓ ᐅᕙᑦᑎᓐᓅᕐᓂᐊᕈᕕᐅᒃ ᐱᔭᕇᕐᓯᒪᔪᖅ ᐃᓕᓐᓂᐊᕈᑎᓄᑦ ᐃᑲᔫᑎᑦᓴᓂᑦ ᑐᑦᓯᕋᐅᑎᓐᓂᑦ ᐋᒐᓯ 5, 2022 ᐅᓐᓄᓴᑯᑦ 5−ᒨᖅᑎᓪᓗᒍ ᕿᑎᕐᒥᐅᑦ ᓯᕿᖕᖑᔭᖓᒍᑦ.
ᖃᖓᑐᐃᓐᓇᑦᑎᐊᖅ ᐅᕙᑦᑎᓐᓄᑦ ᖃᐅᔨᒋᐊᕈᓐᓇᖅᑐᓯ ᐊᐱᖅᑯᑎᖃᕈᑦᓯ ᑐᑦᓯᕋᐅᑎᓕᐅᕐᓂᕐᓂ ᐅᕗᖓ contact@atuqtuarvik.com.