ᐊᑐᖅᑐᐊᕝᕕᒃᑯᑦ ᐃᓄᓐᓄᑦ ᑎᒥᖁᑎᒋᔭᐅᕗᑦ ᑐᖅᑯᐃᓲᖑᓪᓗᑎᒃ ᑮᓇᐅᔭᓂᒃ ᒪᓕᒃᖢᒍ ᑲᓇᑕᐅᑉ ᐱᔅᓇᓯᓄᑦ ᑎᒥᐅᔪᓄᑦ ᐱᖁᔭᖓᓄᑦ ᔪᓂ 9, 2000-ᒥ ᐃᓚᐅᕚᓪᓕᕈᓐᓇᖁᓪᓗᒋᑦ ᐃᓄᖏᑦ ᓄᓇᕘᒥ ᓴᖅᑭᑦᑐᓄᑦ ᐊᖏᔫᑎᓄᑦ ᑮᓇᐅᔭᓕᐅᕈᑎᓕᐊᓄᑦ. ᑎᒥᖁᑎᕗᑦ ᐊᑐᐃᓐᓇᐅᑎᑦᑎᓲᖅ ᐊᑭᓕᒃᓴᒃᑯᑦ ᐱᔅᓇᓯᐅᓪᓗ ᑎᒥᖓᓐᓄᑦ ᑐᖅᑯᐃᔾᔪᑎᓂᒃ ᑮᓇᐅᔭᖃᖅᑎᑦᑎᓪᓗᑎᒃ ᑲᔪᓯᑦᑎᐊᕈᓐᓇᖅᑐᓄᑦ ᐃᓄᐃᑦ ᓇᖕᒥᓂᖁᑎᖏᓐᓄᑦ ᐱᔅᓇᓯᐅᔪᓄᑦ ᐱᒋᐊᓕᓵᖅᑐᓄᑦ, ᓂᐅᕕᕋᖅᑐᓄᑦ ᐊᖏᓕᒋᐊᕆᓇᓱᑦᑐᓄᓪᓗ. ᑎᒥᖁᑎᕗᑦ ᐃᓚᐅᓪᓚᕆᒃᐳᖅ ᐃᓂᖃᖃᑕᐅᓪᓗᓂ ᐱᔅᓇᓯᓂᒃ ᐱᕈᐃᓇᓱᐊᕆᓂᒻᒧᑦ ᓄᓇᕘᑉ ᐃᓗᐊᓂ ᑮᓇᐅᔭᖃᖅᑎᑦᑎᓪᓗᑎᒃ ᐊᑐᖅᑕᐅᔪᓂᒃ ᐃᑲᔪᐃᓪᓗᑎᓪᓗ ᐃᓄᐃᑦ ᐱᔅᓇᓯᖏᓐᓂᒃ ᐊᓯᖏᓐᓂᒃ ᑮᓇᐅᔭᖃᕝᕕᓂᒃ ᕿᓂᖅᓴᐃᔾᔪᑎᓪᓗᒋᑦ. ᖄᒃᑲᓐᓂᐊᒍᑦ, ᓯᕗᓂᖃᑦᑎᐊᕋᓱᐊᓐᓂᒻᒧᑦ ᓇᖕᒥᓂᖃᓐᓂᒻᒧᑦ ᑐᖅᑯᐃᓯᒪᔪᒍᑦ ᓄᓇᖃᖅᑳᖅᓯᒪᔪᑦ ᑮᓇᐅᔭᖃᕝᕕᐊᓄᑦ ᑲᓇᑕᒥ(FNBC).
ᑕᐃᑲᓐᖓᓂᑦ ᒪᑐᐃᕋᑦᑕ, ᐃᑲᔪᐃᓯᒪᕗᒍᑦ ᐅᓄᖅᑐᒻᒪᕆᓐᓂᒃ ᐱᔅᓇᓯᓂᒃ ᐱᒋᐊᖅᐅᓯᒪᔪᑦ ᓄᓇᕘᑉ ᐃᓗᐊᓂ ᐊᔾᔨᒌᓐᖏᑦᑐᓂᒃ ᐱᓕᕆᓂᐅᔪᓂᒃ. ᑲᔪᓯᑦᑎᐊᓐᓂᑦᑎᓐᓄᑦ ᐊᑐᖅᑎᑦᑎᓂᒃᑯᑦ ᑎᒥᒋᔭᐅᔪᓪᓗ ᐃᑲᔫᑎᖏᓐᓂᒃ ᑐᖅᑯᐃᔾᔪᑎᓂᒃ ᐃᓄᐃᑦ ᐱᔅᓇᓯᖏᓐᓄᑦ, ᐃᓚᐅᖃᑕᐅᕗᒍᑦ ᐱᕈᐃᓇᓱᐊᓐᓂᒻᒥᒃ ᓴᓐᖏᔪᒥᒃ ᐃᒻᒥᒃᑯᓪᓗ ᒪᑭᒪᔪᓐᓇᖅᑐᒥᒃ ᑮᓇᐅᔭᓕᐅᕋᓱᐊᕈᑎᓂᒃ ᓄᓇᕘᑉ ᐃᓗᐊᓂ.
ᐃᓕᓴᕆᐅᒪᔭᕗᑦ ᐊᑑᑎᖃᓐᓂᖓ ᓄᓇᕘᑉ ᐃᓅᓯᖃᕈᑎᖏᑦ ᐱᐅᓯᒋᐊᕆᔭᐅᓲᖑᓂᖏᓐᓄᑦ ᑲᔪᓯᑦᑎᐊᖅᑐᓄᑦ ᑮᓇᐅᔭᓕᐅᕋᓱᐊᕈᑎᓄᑦ. ᐃᑲᔪᐃᖃᑦᑕᖅᐳᒍᑦ ᐱᔨᑦᑎᐅᑎᑎᒍᑦ ᑮᓇᐅᔭᓕᕆᔾᔪᑎᒃᑯᑦ ᐅᖃᐅᔾᔨᖅᓱᐃᓂᒃᑯᓪᓗ ᐱᔨᑦᑎᖅᑕᑦᑎᓐᓂᒃ, ᓯᕗᓂᑦᑎᓐᓂᓪᓗ ᑕᑯᔅᓴᕈᕈᓐᓇᖅᑐᓄᑦ, ᑲᒪᒋᔭᔅᓴᑦᑎᓐᓄᑦ. ᐱᔨᑦᑎᖅᑕᕗᑦ ᖁᕕᐊᓱᑦᑎᐊᒋᐊᓲᕗᑦ ᐱᓕᕆᐊᕗᑦ ᓱᓕᑦᑎᐊᖅᑐᒃᑯᑦ ᑲᒪᒋᓪᓗᒋᑦ, ᐊᓯᔾᔨᖅᑐᓄᑦ ᒪᓕᒃᖢᑕ ᐱᔅᓇᓯᖃᖅᑏᑦ ᓵᓐᖓᔭᖏᓐᓄᑦ ᐸᓐᓇᐃᓯᒪᔾᔪᑎᒋᓪᓗᒋᓪᓗ.