ᐱᔅᓇᓯᒥᒃ ᐱᒋᐊᖅᑎᑦᑎᓂᖅ

1. ᓇᑭᓐᖔᓐᓂᖓ

ᐊᓱ, ᐱᒋᐊᕈᒪᕖᓐ ᓇᖕᒥᓂᖅ ᐱᔅᓇᓯᔅᓴᕆᔭᓐᓃᒃ? ᐅᓇ ᑕᑯᓐᓇᒐᔅᓴᖅ ᑎᑎᕋᖅᑕᐅᓂᑯ ᐃᑲᔪᐃᔾᔪᑕᐅᓇᓱᒃᖢᓂ ᐃᓕᓐᓂᒃ ᑕᐃᒪᓐᓇ! ᓇᓗᓇᐃᕆᔪᖅ ᐊᓪᓗᕆᐊᖅᑕᕈᑎᓂᒃ ᒪᓕᒋᐊᓕᑎᑦ. ᐊᑐᕈᓐᓇᖅᑕᐃᓐ ᑐᑭᒧᐊᒍᑎᒋᓗᒍ ᐃᑲᔫᑎᐅᓗᓂᓗ ᐊᓯᖏᓐᓄᑦ ᖃᐅᔨᓴᕆᐊᓕᓐᓄᑦ.
 
ᐃᓚᖓᑦ ᐊᑐᓛᖑᖃᑕᐅᔪᖅ ᐃᖅᑲᐅᒪᔭᕆᐊᓖᑦ ᐱᒋᐊᕋᓱᐊᕈᑎᓄᑦ ᐱᔅᓇᓯᐅᔪᒥᒃ ᑐᑭᓯᐅᒪᑦᑎᐊᓐᓂᖅ ᐱᓕᕆᕝᕕᒋᔪᒪᔭᕕᑦ ᐊᒃᑐᐊᔭᖏᓐᓂᒃ. ᑐᑭᓕᐅᑎᓗᒍ, ᖃᐅᔨᓴᐃᓗᑎᑦ ᐱᔨᑦᑎᕈᒪᔭᓐᓂᒃ ᖃᓄᐃᑦᑑᓂᖏᑕᓗ ᕿᒥᕐᕈᓗᒋᓪᓗ ᒪᓂᒪᐃᔾᔪᑎᔅᓴᑎᑦ ᓄᓇᓕᓐᓂ ᐊᑐᕈᓐᓇᖅᑕᑎᑦ ᐱᔅᓇᓯᒋᔭᓐᓄᓪᓗ (ᐊᑭᑦᑐᕋᐅᑎᖃᑎᑎᑦ ᖃᓄᐃᓕᐅᖅᐸᓐ?). ᑕᒪᓐᓇ ᑐᑭᓯᐅᒪᓗᒍ ᐃᑲᔪᐃᒐᔭᖅᑐᖅ ᖃᓄᑎᒋ ᐱᔅᓇᓯᒋᔪᒪᔭᐃᑦ ᑲᔪᓯᑦᑎᐊᓐᓂᖃᕋᔭᓐᓂᐊᓄᑦ.
 
ᐅᓄᖅᑑᕗᑦ ᐊᔾᔨᒌᓐᖏᑦᑐᑦ ᖃᐅᔨᓴᕈᑕᐅᔪᓐᓇᖅᑐᑦ ᐊᑐᐃᓐᓇᐅᔪᑦ ᐃᓕᔅᓯᓐᓄᑦ ᓲᓪᓗ ᐅᖃᓕᒫᒐᔅᓴᐃᑦ ᐱᔅᓇᓯᖃᓐᓂᒻᒧᑦ, ᑐᑭᓯᐅᒪᔾᔪᑎᓂᒃ ᐳᑯᒐᓱᐊᓐᓂᖅ ᐃᑭᐊᖅᑭᕕᒃᑯᑦ, ᐅᖃᖃᑎᖃᓐᓂᖅ ᐱᓕᕆᔪᓄᑦ ᐱᔅᓇᓯᒋᔪᒪᔭᕕᑦ ᐃᓗᐊᓂ/ᑲᔪᓯᔪᒥᒃ ᐱᔅᓇᓯᓕᓐᓄᑦ, ᐅᖃᖃᑎᖃᓐᓂᖅ ᐱᔨᑦᑎᕋᔭᖅᑕᓐᓂᒃ ᑐᓴᕋᓱᐊᓐᓂᓪᓗ ᑲᓇᑕᒥ ᐱᔅᓇᓯᓄᑦ ᐱᔨᑦᑎᕋᖅᑎᑦ ᓇᖕᒥᓂᖃᖅᑐᓄᑦ ᐱᔅᓇᓯᓂᒃ

ᓂᕆᐅᒃᑲᓗᐊᖅᐳᒍᑦ ᑕᒪᓐᓇ ᑐᑭᓯᓇᑦᑎᐊᓐᓂᖓᓂᒃ. ᓯᕗᓂᔅᓴᑦᑎᐊᕙᖃᕆᑦ ᐱᔅᓇᓯᑖᕋᓱᐊᓐᓂᒃᑯᑦ!

2. ᐱᒋᐊᓚᐅᖏᓐᓂᓐᓂ

ᐃᓄᒃ ᓴᓇᔨᐅᖃᑕᐅᔪᖅ ᓴᓇᔭᐅᓲᓄᑦ 
ᐱᓕᕆᒋᐊᓚᐅᖏᓐᓂᓐᓂᑦ ᐃᓱᒪᒃᓴᖅᓯᐅᕈᑎᖃᑦᑎᐊᕆᑦ ᕿᒥᕐᕈᔭᕆᐊᓕᓐᓂᒃ ᑲᔪᓯᑦᑎᐊᕈᑎᔅᓴᕆᒐᔭᖅᑕᑎᑦ ᓇᓪᓕᖅᓯᒪᒍᕕᒋᑦ ᓲᓪᓗ:

  • ᐃᒻᒥᒃᑯᑦ ᐊᐅᓚᑦᑐᓐᓇᖅᓯᕖᑦ ᓇᖕᒥᓂᖅ ᐱᔅᓇᓯᒋᔭᓐᓃᒃ?
  • ᐱᔅᓇᓯᖃᓐᓂᒻᒧᑦ ᐊᐅᓚᑦᑎᓂᒻᒥᒃ ᐃᓕᓐᓂᐊᖅᓯᒪᓂᖃᖅᐲᓐ?
  • ᐸᓐᓇᐃᓯᒪᕖᓐ ᐱᔭᕆᐊᑐᔪᒥᒃ ᐊᑐᕆᐊᔅᓴᖅ ᐅᓪᓗᒐᓴᓂᒃ, ᑮᓇᐅᔭᖁᑎᓐᓂᒃ ᐊᒻᒪ ᐊᒃᓱᕈᓪᓚᕆᒋᐊᖃᓐᓂᒻᒥᒃ ᐱᔅᓇᓯᒋᔭᐃᑦ ᑲᔪᓯᑦᑎᐊᕈᓐᓇᖁᓪᓗᒎ?
  • ᐅᓄᓐᓂᖅᓴᐃᑦ ᐱᔅᓇᓯᐅᔪᑦ ᐱᒋᐊᓕᓵᖅᖢᑎᒃ ᑮᓇᐅᔭᓕᐅᑦᑎᐊᕈᓐᓇᖏᒻᒪᑕ. ᓴᓂᕝᕙᐃᓯᒪᕖᓐ ᐊᑐᕋᔅᓴᓐᓂᒃ ᑮᓇᐅᔭᓕᐅᓐᖏᓪᓗᑎᑦ ᐊᑐᓐᓂᐊᖅᑕᓐᓂᒃ ᐱᓇᓱᐊᕈᓯᒐᓴᓐᓄᑦ ᐊᓯᐊᒍᓪᓘᓐᓃᑦ ᑮᓇᐅᔭᓕᐅᕈᑎᖃᕆᕕᓐ?
  • ᐃᓂᔅᓴᖔ, ᓴᓇᔾᔪᑎᔅᓴᑎᑦ ᓱᓇᒃᑯᑖᖏᓪᓗ ᐱᓯᒪᕕᒌᑦ ᐊᑐᕆᐊᖃᖅᑕᑎᓐ ᐊᑐᐃᓐᓇᐅᑲᐅᑎᒋᕙᓪᓘᓐᓃᑦ ᐃᓕᓐᓅᑦ?
ᐃᓄᒃ ᓴᓇᖃᑕᐅᔪᖅ

3. ᑭᓱ ᐱᓕᕆᖅᑳᕆᐊᖃᖅᐸᒃᑲ?

ᐃᓱᒪᓕᐅᕆᔭᕆᐊᖃᖅᐳᑎᑦ ᐱᖁᔭᖅᑎᒍᑦ ᖃᓄᐃᑦᑐᒥᒃ ᐱᔅᓇᓰᑦ ᐃᓕᖅᑯᓯᖃᓐᓂᐊᓄᑦ. ᑎᓴᒪᐅᒻᒪᑕ ᐊᑐᖅᑕᐅᓲᑦ ᐱᖁᔭᖅᑎᒍᑦ ᐃᓕᓴᕆᔭᐅᓯᒪᔪᑦ ᐱᔅᓇᓯᐅᔪᓄᑦ ᐃᓕᖅᑯᓯᐅᓲᑦ:

  • ᐃᓄᑑᔾᔨᓂᖅ ᐱᔅᓇᓯᐅᔪᒥᒃ - ᑐᑭᖃᖅᐳᖅ ᐃᕝᕕᑐᐊᑦᑎᐋᖅ ᐸᓯᔭᒃᓴᐅᕗᑎᑦ ᐱᔅᓇᓯᐅᔪᒧᑦ ᐊᒻᒪᓗ ᐃᓅᓰᑦ ᐊᕕᒃᓯᒪᓇᓂ ᐱᔅᓇᓯᕆᔭᓐᓂᒃ. ᐃᑲᔫᑎᖏᑦ ᑮᓇᐅᔭᓕᐅᓕᒫᑦ ᐱᒋᓪᓗᒋᑦ ᐊᒻᒪᓗ ᐃᒻᒥᒃᑯᑐᐊᖅ ᐊᖅᑮᒋᐊᕆᔪᓐᓇᖅᖢᑎᒃ ᑕᒪᓐᓇᓗ ᐱᖁᔭᖅᑎᒍᑦ ᐊᑭᑭᓛᖑᔪᖅ ᓇᑉᐸᐃᔭᕆᐊᒥᒃ. ᐃᓗᐊᓐᖏᓕᐅᕈᑖ ᐅᓇ; ᑭᓯᐊᓂᓕ ᐱᔅᓇᓯᒋᔭᐃᑦ ᐃᖅᑲᖅᑐᐃᕕᒃᑯᑦ ᐸᓯᔭᒃᓴᐅᓂᕋᖅᑕᐅᒍᓂ, ᐃᓕᓐᓂᒃ ᐃᖅᑲᖅᑐᐃᔨᒧᐊᖅᓯᒻᒪᑕ ᐸᓯᔭᒃᓴᐅᒐᔭᖅᖢᑎᑦ. ᐊᒻᒪᓗᑦᑕᐅᖅ, ᐊᑭᓕᕆᐊᓖᑦ ᑲᒪᒋᔭᕆᐊᓕᑎᑦ ᐱᓕᕆᔭᔅᓴᓕᒫᓪᓗ, ᑮᓇᐅᔭᓕᐅᑎᓪᓗ ᐃᓚᓕᐅᔾᔭᐅᑲᐅᑎᒋᓪᓗᑎᒃ ᐃᓐᑲᒥ ᑖᒃᓯᓕᕆᔨᒃᑯᓐᓄᑦ.
     
  • ᖃᑐᔾᔨᖃᑎᒌᒃᑐᑦ – ᖃᔅᓯᒐᓚᐃᑦ ᐃᓄᐃᑦ ᑲᑐᔾᔨᓪᓗᑎᒃ ᐱᔅᓇᓯᓕᐊᖃᖅᑐᑦ. ᐊᔾᔨᑲᓴᖓ ᐃᓄᑑᔾᔨᓂᒻᒥᒃ ᐱᔅᓇᓯᒥᒃ; ᑭᓯᐊᓂᓕ, ᐊᑕᐅᓯᐅᓐᖏᑦᑐᒧᑦ ᐱᔅᓇᓯᒋᔭᐅᒻᒪᑦ ᐱᓕᕆᖃᑕᐅᔪᓂᒃ, ᑲᑐᔾᔨᓂᖏᓐᓄᑦ ᐱᔅᓇᓯᖃᕋᔭᒻᒪᑕ. ᐊᑎᓕᐅᖅᑕᐅᓯᒪᔪᒥᒃ ᑎᑎᕋᖅᓯᒪᔪᒥᒃ ᐱᑕᖃᓪᓗᐊᖅᑐᖅ ᓇᓗᓇᐃᕆᓯᒪᔪᖅ ᓇᓪᓕᐊᒃ ᑭᓱᒥᒃ ᐱᓕᕆᐊᖃᓐᓂᐊᒻᒪᖔᑦ ᐊᑐᓐᓂᐊᖅᑕᖏᓂᓪᓗ.
     
  • ᑯᐊᐸᓕᐊᖃᖅᑐᑦ – ᐱᔅᓇᓯᓕᐊᖑᔪᐃᑦ ᐃᓄᒋᐊᒃᑐᓄᑦ ᐃᓚᒋᔭᐅᔪᓄᑦ (ᐊᖅᐸᓯᓛᖅ ᑕᓪᓕᒪᑦ ᐃᓄᐃᑦ) ᓴᖅᑭᑕᐅᓪᓗᓂ ᑲᑐᔾᔭᐅᔪᖅ ᐱᔭᐅᓯᒪᔭᕆᐊᓕᒃ. ᐃᓚᒋᔭᐅᔪᑦ ᐱᕕᖃᖅᖢᑎᒃ ᑎᒥᐅᔪᒥᒃ ᐊᐅᓚᑕᐅᓪᓗᓂ ᐱᔅᓇᓯᖓ ᒪᕐᕉᓐᓄᑦ, ᑲᑎᒪᔨᖁᑎᖏᑦ ᓂᕈᐊᖅᑕᐅᓯᒪᔪᑦ ᐊᒻᒪᓗ ᐊᕐᕌᒍᑕᒫᖅᓯᐅᑦ ᑲᑎᒪᕕᒡᔪᐊᓐᓂᖓ. ᐱᔅᓇᓯᐅᑉ ᐱᒋᐊᕈᑎᔅᓴᖏᑦ ᓴᖅᑭᑕᐅᓪᓗᑎᒃ ᐃᓚᒋᔭᐅᔾᔪᑎᖏᓄᑦ ᑮᓇᐅᔭᓄᑦ ᐊᑐᓂᓪᓗ ᐊᑭᓕᒐᔅᓴᖏᑦ ᐃᓚᒋᔭᐅᔪᑦ ᓇᓗᓇᐃᖅᑕᐅᓪᓗᑎᒃ ᓇᖕᒥᓂᖃᖃᑕᐅᓂᖏᓐᓄᑦ. ᐱᖓᓱᐃᓕᖓᓲᑦ ᑯᐊᐸᓐᖑᖅᑎᑕᐅᔪᑦ: ᐃᖅᑲᓇᐃᔭᖅᑎᓄᑦ, ᓴᓇᔪᓕᕆᔨᓄᑦ ᐊᒻᒪᓗ ᓂᐅᕕᕋᖅᑎᑦ.
     
  • ᑎᒥᓐᖑᖅᑎᑦᑎᓂᖅ – ᑕᒪᓐᓇ ᐱᖁᔭᖅᑎᒍᑦ ᐊᑭᑐᓛᖑᓪᓗᓂ ᒪᑭᑦᑕᕆᐊᖓᓐ, ᐸᐃᑉᐹᓕᕆᔭᕆᐊᑐᓂᖅᓴᐅᓪᓗᓂ ᐃᖅᑲᓇᐃᔭᖅᑎᖃᕆᐊᖃᖅᖢᓂ ᐊᑕᐅᓯᐅᓐᖏᑦᑐᒥᒃ, ᐃᑲᔫᑎᖃᕆᕗᖅ ᑎᒥᓐᖑᖅᑎᑦᑎᓂᖅ. ᐸᐃᑉᐹᑎᒍᑦ ᑎᒥᓐᖑᐃᓪᓗᓂ, ᐃᑲᔪᐃᓂᓕᒃ ᐱᔅᓇᓯᒋᔭᐃᑦ ᐊᕕᒃᓯᒪᓪᓗᓂ ᐱᖁᔭᖅᑎᒍᑦ, ᑕᒪᓐᓇ ᑭᒡᓕᖃᖅᑎᑦᑎᒻᒪᑦ ᐸᓯᔭᒃᓴᐅᓂᖏᑕ ᑲᑎᒪᔨᖏᑦ ᓇᖕᒥᓂᖃᖅᑎᐅᔪᓪᓗ. ᐊᑭᓕᒃᓴᖃᖅᑎᑦᑎᔩᑦ ᐃᖅᑲᖅᑐᐃᕕᒃᑯᑦ ᓇᖕᒥᓂᖃᖅᑎᓂᒃ ᓵᓐᖓᔪᓐᓇᓐᖏᓚᑦ ᑲᑎᒪᔨᖏᑦ ᐸᓯᔭᒐᓛᒍᓐᓇᕋᓗᐊᖅᖢᑎᒃ. ᑖᒃᓰᔭᐃᓂᖅ ᐊᖅᐸᓯᓐᓂᖅᓴᐅᓪᓗᓂ ᐃᑲᔫᑎᐅᒋᕗᖅ. ᐊᖏᓛᖅ ᐃᑲᔫᑎᖃᕈᑖ ᐊᔪᓐᓇᖏᓐᓂᖅᓴᐅᒻᒪᑦ ᑮᓇᐅᔭᒥᒃ ᐱᕈᐃᓇᓱᐊᖅᖢᓂ ᐊᓯᖏᓐᓂᒃ ᐱᔅᓇᓯᒋᔭᐅᔪᓂᒃ.

ᖃᓄᐃᑦᑑᓂᖓ ᐱᔅᓇᓯᕕᑦ ᐋᖅᑭᔅᓯᒪᓂᐊ ᐊᒃᑐᖅᑕᐅᔪᓐᓇᕆᕗᖅ ᐅᑯᓄᖓ: 
 

  •  ᐃᒻᒥᒃᑯᑦ ᐸᓯᔭᒃᓴᐅᓃᑦ - ᖃᓄᑎᒋ ᐸᓯᔭᒃᓴᐅᓂᖃᕈᒪᒐᔭᖅᐱᓐ ᐱᔅᓇᓯᒋᔭᐃᑦ ᐃᓗᐊᓐᖏᓕᐅᕈᑎᓕᓐᓂᕈᓂ;
     
  • ᑖᒃᓰᔭᐃᓃᑦ - ᐊᑐᓂᑦ ᐃᓗᓪᓕᖅᓱᕆᐊᓕᒃ ᐃᓱᖃᖅᐳᖅ ᐃᓂᖃᖅᖢᓂᓗ ᑖᒃᓰᔭᐃᔾᔪᑖ;
     
  • ᐊᑐᖅᓯᒪᓂᑯᑎᑦ – ᖃᐅᔨᒪᓂᖃᑦᑎᐊᖅᐲᓐ ᐱᔅᓇᓯᒥᒃ ᐃᒻᒥᒃᑯᑦ ᐊᐅᓚᑦᑎᒋᐊᒦᒃ ᐅᕝᕙᓘᓐᓃᑦ ᐊᓯᓐᓂᒃ ᐃᑲᔪᖅᑎᖃᕆᐊᖃᕋᔭᖅᐱᓐ ᖃᐅᔨᒪᔨᑕᓂᒃ.
     

ᓇᓗᓇᐃᕈᕕᐅᒃ ᐱᔅᓇᓯᒋᔪᒪᔭᐃᑦ ᐱᒋᐊᖅᑎᑦᑐᒪᔭᐃᑦ, ᖃᐅᔨᓴᐃᓂᖃᕆᑦ ᐃᓂᒋᔭᖓᑕ ᐱᔅᓇᓯᒋᔪᒪᔭᕕᑦ. ᖃᐅᔨᓴᐃᓂᖅ ᐃᓗᓕᖃᓪᓗᓂ ᑭᓇᒃᑯᑦ ᑐᕌᕆᒻᒪᖔᖅᐱᒋᑦ ᐱᔪᒪᓂᕆᔭᖃᓐᓂᖏᓪᓗ ᓇᒥᓪᓗ ᐱᔅᓇᓯᒋᔭᐃᑦ ᐃᓂᖃᓐᓂᐊᓐᓂᖓ.

4. ᖃᐅᔨᒪᔪᖓ ᖃᓄᐃᑦᑐᒥᒃ ᐱᔅᓇᓯᒥᒃ ᓴᖅᑮᒋᐊᒥᒃ, ᖃᓄᖅᑕᐃᒪ?

ᖃᓄᐃᑦᑑᓂᖓᓐᓂᒃ ᐱᔅᓇᓯᒋᔪᒪᔭᓐᓂᒃ ᓇᓗᓇᐃᖅᓯᒍᕕᑦ, ᐱᒋᐊᓪᓗᒍ ᐱᔅᓇᓯᒧᑦ ᐸᓐᓇᐅᑎᔅᓴᐃᑦ ᐃᓱᒪᒋᔭᑎᑦ ᑎᑎᕋᓪᓗᒋᑦ, ᐃᓱᒪᓕᐊᑎᑦ, ᑐᑭᓯᐅᒪᔾᔪᑎᔅᓴᑎᑦ ᑮᓇᐅᔭᖁᑎᒋᓂᐊᖅᑕᑎᓪᓗ. ᐱᔅᓇᓯᒧᑦ ᐸᓐᓇᐅᑎ ᐊᑑᑎᖃᕈᑎᖃᖅᐳᖅ ᓇᓗᓇᐃᖅᓯᓲᖑᒻᒪᑦ ᐃᓱᒪᓕᐊᕆᔭᑦ ᑲᔪᓯᔪᓐᓇᓐᓂᖃᓐᓂᐊ. ᑮᓇᐅᔭᖃᖅᑎᑦᑎᔨᔅᓴᐃᓪᓗ ᑕᑯᓲᖑᕗᑦ ᐊᒃᓱᕉᑎᖃᓐᓂᓐᓂᒃ ᐱᔅᓇᓯᒥᒃ ᐱᒋᐊᕆᐊᒥᒃ ᖃᓄᓪᓗ ᑮᓇᐅᔭᖏᑦ ᐊᑐᕋᔭᖅᑕᑎᑦ ᑭᓱᓄᑦ ᐊᑐᕋᔭᒻᒪᖔᖏᑕ. ᑖᓐᓇ ᐱᔅᓇᓯᒧᑦ ᐸᓐᓇᐅᑎ ᑐᑭᒧᐊᒍᑎᑦᑎᐊᕙᐅᒋᕗᖅ ᐃᓕᓐᓄᑦ ᐱᔅᓇᓯᒋᔭᐃᑦ ᒪᑭᓯᒋᐊᕈᕕᐅᒃ. ᐱᔅᓇᓯᒧᑦ ᐸᓐᓇᐅᑎᐅᑉ ᑎᑎᕋᖅᓯᒪᓂᐊ ᒪᑯᓂᖓ ᑐᑭᓯᐅᒪᔾᔪᑎᓂᒃ ᐃᓗᓕᖃᒐᔪᒃᑐᖅ ᐊᒡᒍᖅᓯᒪᐅᖅᑐᓂᒃ:

  • ᓯᕗᓕᖅᑎᓄᑦ ᓇᐃᓕᒋᐊᖅᓯᒪᔪᖅ/ᐱᔅᓇᓯᐅᑉ ᖃᓄᐃᑦᑑᓂᖓᑕ ᐅᓂᒃᑳᖓ
  • ᐱᓕᕆᐊᔅᓴᐅᑉ ᐊᑭᑐᔫᑎᖏᑦ ᑮᓇᐅᔭᖃᕝᕕᔅᓴᐃᓪᓗ ᐆᒃᑐᕋᕝᕕᐅᓯᒪᔪᑦ
  • ᓴᓇᔭᐅᔪᖅ/ᐱᔨᑦᑎᕋᓐᓂᖅ
  • ᐱᔫᒥᓴᐅᑎᓕᐊᑦ
  • ᐊᐅᓚᑕᐅᓂᖓᓄᑦ ᑕᑯᔅᓴᕈᕆᐊᓖᑦ
  • ᑲᒪᔨᐅᓂᐊᖅᑐᑦ
  • ᐃᖅᑲᓇᐃᔭᖅᑏᑦ, ᐱᓕᒻᒪᔅᓴᕈᑏᑦ ᐊᒻᒪᓘᓐᓃᑦ ᐱᓕᕆᔪᓐᓇᓐᓂᒻᒧᑦ ᓇᓗᓇᐃᕈᑏᑦ
  • ᑐᓴᕆᐊᕝᕕᐅᔪᓐᓇᖅᑐᑦ
  • ᑮᓇᐅᔭᓕᐊᔅᓴᐃᑦ ᓂᕆᐅᒋᔭᑎᑦ
  • ᐊᓯᒃᑲᓐᓂᖏᑦ ᑐᑭᓯᐅᒪᔾᔪᑏᑦ

ᑐᑭᓯᒋᐊᕈᑎᔅᓴᒃᑲᓐᓂᓐᓄᑦ ᐱᔅᓇᓯᐅᑉ ᐸᓐᓇᐅᑎᖏᓐᓄᑦ ᐊᔪᕆᑕᔅᓴᓄᓪᓗ ᐸᓐᓇᐅᑎᓕᐊᔅᓴᓂᒃ, ᑐᓴᕆᐊᕝᕕᒋᒃᑭᑦ CNBSC-ᑯᑦ ᑎᑎᕋᖅᓯᒪᔭᖏᑦ ᐱᔅᓇᓯᐅᑉ ᐸᓐᓇᐅᑎᖏᓐᓄᑦ ᑐᑭᒧᐊᒍᑏᑦ ᐊᒻᒪᓘᓐᓃᑦ ᐊᑐᓪᓗᒍ ᐃᑭᐊᖅᑭᕕᐊᓂ ᖃᕆᓴᐅᔭᒃᑯᑦ ᐸᓐᓇᐅᑎᓕᐅᕈᑎᖏᑦ ᐅᕙᓂ www.canadabusiness.ca/eng/.

5. ᐱᐅᔪᒻᒪᕆᒻᒥᒃ ᐃᓱᒪᓕᐊᖃᖅᓯᒪᔪᖓ ᖃᓄᓪᓕᑕᐃᒪ ᑮᓇᐅᔭᖃᖅᑎᑕᐅᔪᓐᓇᖅᐸ?

ᖃᔅᓯᒐᓚᐅᕗᑦ ᐱᓕᕆᕖᑦ ᐅᐸᒃᑕᐅᓲᑦ ᓴᖅᑮᔪᒪᔪᓄᑦ ᐱᔅᓇᓯᓂᒃ ᓇᖕᒥᓂᖃᕈᒪᔪᓄᑦ ᓄᓇᕘᑉ ᐃᓗᐊᓂ ᑮᓇᐅᔭᖃᖅᑎᑦᑎᓲᖑᔪᓂᒃ. ᐃᖅᑲᐅᒪᓗᒍ ᑕᒪᐃᓐᓂᒃ ᑎᒥᐅᔪᑦ ᕿᒥᕐᕈᐃᓲᑦ ᐃᕝᕕᑦ ᐃᓚᓕᐊᖏᓐᓂᒃ (ᑮᓇᐅᔭᖁᑎᑎᑦ ᐊᒻᒪᓗ ᐱᓕᕆᓗᑎᑦ ᐃᑲᔪᐃᓂᑎᑦ), ᐊᑐᖅᑐᐊᒐᑎᑦ ᑮᓇᐅᔭᐃᑦ ᐊᒻᒪᓗ ᑐᓐᓂᖅᓴᒐᐃᑦ/ᐃᑲᔫᑎᓕᐊᖑᔪᑦ ᑮᓇᐅᔭᐃᑦ (ᐅᑎᖅᑎᑦᑕᕆᐊᖃᓐᖏᑦᑐᑦ). ᐅᕙᓂ ᓇᓂᔭᔅᓴᐅᔪᑦ ᑮᓇᐅᔭᖅᑖᖅᑎᑦᑎᓲᑦ ᑎᒥᐅᔪᑦ.

6. ᐸᓐᓇᐅᑎᖃᓕᖅᑐᖓ ᑮᓇᐅᔭᖃᖅᑎᑕᐅᓕᖅᖢᖓᓗ, ᖃᓄᐃᓕᐅᕆᐊᖃᓕᖅᐳᖓᓕ?

ᐱᔅᓇᓯᒥᒃ ᐊᐅᓚᑦᑎᔪᒪᒍᕕᑦ, ᑐᕌᖓᓪᓚᕆᒃᑐᓂᒃ ᒪᓕᒐᕋᓛᓂᒃ ᐱᑕᖃᖅᐳᖅ ᒪᓕᒃᑕᐅᔭᕆᐊᓕᓐᓂᒃ ᓚᐃᓴᓐᓯᖃᕆᐊᖃᓲᖑᓪᓗᑎᓪᓗ ᐅᓄᖅᑐᑦ. ᑖᒃᑯᐊ ᒪᓕᒐᕋᓛᑦ ᐊᔾᔨᒌᓐᖏᑦᑐᑦ ᒪᓕᒃᖢᑎᒃ ᖃᓄᐃᑦᑑᓂᖓᓄᑦ ᓇᒦᓐᓂᖓᓄᓪᓗ ᐱᔅᓇᓯᒋᔭᐃᑦ ᑭᓯᐊᓂ ᐊᑐᕆᐊᖃᓪᓚᕆᒃᑐᑦ ᖃᔅᓯᒐᓚᐅᒋᓪᓗᑎᒃ. ᑐᑭᓯᒋᐊᕈᑎᑦ ᐊᓯᖏᓄᓪᓗ ᐊᑎᓕᐅᖅᓯᒪᔭᕆᐊᓖᑦ ᐱᔅᓇᓯᑦ ᓇᓗᓇᐃᕝᕕᖏᒍᑦ ᑐᓴᕆᐊᕝᕕᔅᓴᐃᓪᓗ ᐅᖄᓚᔭᔅᓴᑦ ᓇᓂᔭᔅᓴᐅᕗᑦ ᐃᓗᐊᓂ ᒪᓕᒐᕋᓛᑦ ᓚᐃᓴᓐᓯᖃᖅᑎᑦᑎᔩᓪᓗ ᑐᑭᓯᒋᐊᕈᑎᖏᓐᓂᒃ ᐊᒻᒪᓘᓐᓃᑦ ᐃᑭᐊᖅᑭᕕᐊᓂ ᑲᓇᑕᒥ ᐱᔅᓇᓯᓄᑦ ᐱᔨᑦᑎᕋᖅᑎᑦ ᓇᖕᒥᓂᖃᖅᑎᓄᑦ ᐱᔅᓇᓯᓂᒃ.

  1. ᓄᓇᓕᐅᑉ ᒐᕙᒪᖏᑕ ᓚᐃᓴᓐᓯᓄᑦ, ᑭᒡᓕᖃᕈᑎᓄᑦ ᒪᓕᒐᕋᓛᓄᓪᓗ - ᐱᒋᐊᕈᒪᒍᕕᐅᒃ ᐱᔅᓇᓯᒋᔭᐃᑦ ᓄᓇᓕᐅᔪᒥᒃ ᓇᓗᓇᐃᖅᓯᒪᔪᖅ ᕼᐋᒻᒪᓚᐅᓂᖓᓂᒃ, ᓄᓇᓕᒃ, ᓄᓇᓕᔾᔪᐊᖅ ᐊᒻᒪᓘᓐᓃᑦ ᓄᓇᓕᖅᐸᐅᔭᖅ ᐱᔅᓇᓯᓄᑦ ᓚᐃᓴᓐᓯᒥᒃ ᐱᔭᕆᐊᖃᖅᐳᑎᑦ ᐊᒡᓚᒡᕕᐊᓂ. ᖃᐅᔨᒋᐊᓪᓗᑎᑦ ᓄᓇᓕᓐᓂ ᑭᒡᓕᖃᒻᒪᖔᑕ ᐃᓱᖃᐅᑎᓂᓪᓘᓐᓃᑦ ᒪᓕᒐᕋᓛᓂᒃ ᐱᔅᓇᓯᐅᔪᓐᓇᖅᑐᓄᑦ. ᑐᑭᓯᒋᐊᕈᒪᒍᕕᑦ ᓄᓇᓕᓐᓂ ᒐᕙᒪᓯ ᑐᓴᕆᐊᕝᕕᒋᒃᑭᑦ.
  2. ᐃᖅᑲᓇᐃᔭᖅᑎᓄᑦ ᐅᓗᕆᐊᓇᖅᑕᐃᓕᒪᔪᓕᕆᔨᒃᑯᑦ ᑲᑎᒪᔨᖏᑦ  – ᐱᔭᕆᐊᖃᖅᐳᑎᑦ ᐸᐃᑉᐹᒥᒃ ᓇᓗᓇᐃᕆᔪᖅ ᒪᓕᑦᑎᐊᓐᓂᖓᑕ ᐱᔅᓇᓰᑦ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᖅᑎᑦᑎᔪᒧᓪᓗ ᐱᒋᐊᓚᐅᖏᓐᓂᓐᓂ ᐱᔅᓇᓯᒋᔭᓐᓂᒃ. ᐊᓯᖏᓐᓂᒃ ᐊᐅᓚᓂᒻᒧᑦ ᓚᐃᓴᓐᓯᓂᒃ ᐱᔭᕆᐊᖃᕆᕗᑎᑦ, ᑐᑭᓕᐅᑎᓗᒍ, ᐊᐅᓪᓚᐅᔾᔨᔩᑦ ᓚᐃᓴᓐᓯᖓᓐᓂᒃ. ᐊᑎᖃᖃᑕᐅᔪᒪᒍᕕᑦ, ᑐᓴᕆᐊᕝᕕᒋᒃᑭᑦ WCB-ᑯᑦ.
  3. ᐱᔅᓇᓯᒋᔭᐃᑦ ᐊᑎᓕᐅᖅᑕᐅᓂᖓ – ᑕᒪᒻᒥᑦᑎᐊᖅ ᐱᔅᓇᓰᑦ ᑮᓇᐅᔭᓕᐅᕋᓱᖅᑎᐅᓐᖏᑦᑐᑦ ᑎᒦᑦ ᐊᐅᓚᓂᖃᕈᒪᔪᑦ ᓄᓇᕘᒥ ᐊᑎᓕᐅᖅᓯᒪᔭᕆᐊᓖᑦ ᐊᑎᖃᖃᑕᐅᓗᓂ ᐱᔅᓇᓯᖓ ᓄᓇᕘᒥ ᒪᓕᒐᒃᑯᑦ ᐊᑎᖃᐅᓯᖃᕝᕕᐊᓂ.
  4.  ᐱᔅᓇᓯᒧᑦ ᓈᐃᓴᐅᑎ – ᐱᔪᒪᑐᐃᓐᓇᕆᐊᖃᖅᑐᑎᑦ ᐱᔅᓇᓯᒧᑦ ᓈᐃᓴᐅᑎᒥᒃ ᐱᔭᕆᐊᑐᖁᓐᖏᒃᑯᕕᐅᒃ ᓱᒃᑲᓂᖅᓴᒥᓪᓗ ᐊᐅᓚᖁᒍᕕᐅᒃ ᐱᔅᓇᓯᕕᑦ ᑲᒪᒋᔭᖃᓐᓂᖓ ᒐᕙᒪᐅᔪᓂᒃ. ᐱᔅᓇᓯᐅᑉ ᓈᐃᓴᐅᑎᖓ ᐱᖃᓯᐅᔾᔨᓲᖅ ᑎᓴᒪᓂᒃ ᐃᓐᑲᒥ ᑖᒃᓯᓕᕆᔨᒃᑯᑦ ᐱᔅᓇᓯᓄᑦ ᓴᖅᑭᓯᒪᔭᖏᓐᓄᑦ: ᐱᔅᓇᓯᐅᑉ ᑖᒃᓰᔭᕋᔅᓴᖓ, ᑎᑭᑎᑦᑎᔾᔪᑎᑦ/ᓇᒃᓯᐅᔾᔨᔾᔪᑎᑦ, ᐃᖅᑲᓇᐃᔭᖅᑎᑦ ᐃᓚᓐᖓᐅᑎᒋᓲᖏᑦ, ᐊᒻᒪᓗ GST/HST. ᑐᑭᓯᒋᐊᕈᑎᔅᓴᓂᒃ ᐱᔪᓐᓇᖅᐳᓯ ᑲᓇᑕᒧᑦ ᐃᓯᖅᑐᓕᕆᔨᒃᑯᑦ ᑮᓇᐅᔭᓕᐅᕈᑎᓄᓪᓗ ᑎᒥᖁᑖᓂᒃ.
  5. ᐃᖅᑲᓇᐃᔭᑎᓄᑦ ᐃᓚᓐᖓᐅᑏᑦ - ᐅᓇ ᑖᒃᓰᔭᐃᓂᖅ ᑲᒪᒋᔭᐅᔭᕆᐊᓕᒃ ᐃᖅᑲᓇᐃᔭᖅᑎᑦᑎᔨᐅᔪᓄᑦ. ᐱᔅᓇᓯᐅᔪᖅ ᓄᓇᕘᒥᑦ ᐊᑎᓕᐅᖅᓯᒪᒋᐊᓕᒃ ᐅᓪᓗᑦ 21 ᐃᓗᐊᒍᑦ ᐊᑭᓖᖃᑦᑕᓯᒋᐊᓐᓂᖓᑕ ᐃᖅᑲᓇᐃᔭᖅᑎᖏᓐᓂᒃ. ᑐᑭᓯᒋᐊᕝᕕᒃᓴᐅᔪᑦ ᓄᓇᕘᒥᑦ ᒐᕙᒪᖏᑕ ᑮᓇᐅᔭᓕᕆᔨᒃᑯᖏᑦ ᐊᐅᓚᑦᑎᔨᓪᓗ ᐱᓕᕆᕝᕕᐊᓂ.
  6. ᓄᓇᓕᒻᒥ ᐱᔅᓴᓯᓄᑦ ᑖᒃᓯᑦ – ᐃᓚᖏᑦ ᓄᓇᓖᑦ ᒪᓕᒐᕋᓛᒥᒍᑦ ᐊᑭᓕᒐᒃᓴᖃᖅᑎᑦᑎᓲᑦ ᐱᔅᓇᓯᐅᑉ ᓚᐃᓴᓐᓯᖓᓐᓂᒃ ᑐᓐᖓᕕᖃᖅᖢᓂ ᓇᓗᓇᐃᖅᑕᐅᓯᒪᔪᒥᒃ ᐳᓴᓐᑎᒥᒃ ᐊᑐᖅᑐᐊᒐᕕᑦ ᐊᑭᓪᓗᐊᖓᓂᒃ. ᑐᓴᕆᐊᕆᑦ ᓄᓇᓕᕕᑦ ᒐᕙᒪᖓᑕ ᐊᒡᓚᒡᕕᐊᓄᑦ ᑐᑭᓯᒋᐊᕈᒪᒍᕕᑦ.

ᖃᔅᓯᒐᓚᐅᕗᑦ ᐊᑐᕆᐊᖃᓗᐊᓐᖏᑦᑐᑦ ᒪᓕᒐᖅᑎᒍᑦ ᑭᓯᐊᓂ ᐊᑐᕈᒥᒋᔭᐅᔪᑦ:

  1. ᓇᓪᓕᐅᒃᑯᒫᑦ – ᐱᔭᕆᐊᖃᑐᐃᓐᓇᕆᐊᖃᖅᐳᑎᑦ ᐸᓯᔭᒃᓴᐅᓂᒻᒧᑦ ᓇᓪᓕᐅᒃᑯᒫᒥᒃ ᓇᖕᒥᓂᖃᓐᓂᒻᒧᓪᓗ ᓇᓪᓕᐅᒃᑯᒫᒥᒃ ᐊᐅᓚᔪᒪᒍᕕᑦ. ᐊᑭᖏᑦ ᒪᓕᒃᑲᔭᖅᑐᑦ ᖃᓄᐃᑦᑑᓂᖓᓄᑦ ᐊᒃᑎᒋᓂᐊᓐᓄᓪᓗ ᐱᔅᓇᓯᒋᔭᕕᑦ. ᑐᓴᕆᐊᕆᑦ ᓇᓪᓕᐅᒃᑯᒫᓕᕆᔨᓂᒃ ᐱᔭᕆᐊᓕᓐᓂᒃ ᓇᓪᓕᐅᒃᑯᒫᓂᒃ.
  2. ᐱᔅᓇᓯᒧᑦ ᑐᕌᖓᓪᓚᕆᒃᑐᑦ ᐊᑐᕆᐊᓖᑦ – ᒪᓕᒃᖢᓂ ᖃᓄᐃᑦᑑᓂᖓᑕ ᐱᔅᓇᓯᕕᑦ ᐱᒋᐊᖅᑕᕕᑦ, ᐊᓯᖏᓐᓂᒃ ᐱᑕᖃᑐᐃᓐᓇᕆᐊᓕᒃ ᐊᑐᕋᔅᓴᓂᒃ ᓲᓪᓗ ᓚᐃᓴᓐᓰᑦ ᐱᔪᓐᓇᐅᑎᓪᓗ. ᑐᑭᓕᐅᑎᓗᒍ, ᐱᔅᓇᓰᑦ ᓂᕿᔅᓴᓂᒃ ᓂᐅᕐᕈᑎᖃᓲᑦ ᑲᒪᑦᑎᐊᖅᑐᓕᕆᔨᓂᒃ ᖃᐅᔨᓴᖅᑎᓂᒃ ᐃᓯᖅᑕᐅᖃᑦᑕᕋᔭᖅᑐᑦ ᐃᑯᐊᓪᓚᒃᑕᐃᓕᒪᔪᓕᕆᔨᓂᓪᓗ. ᑭᓇᑐᐃᓐᓇᖅ ᐊᐅᓪᓚᐅᔾᔨᔨᐅᔪᒪᔪᖅ ᓚᐃᓴᓐᓯᖃᕆᐊᓕᒃ ᐊᐅᓪᓚᐅᔾᔨᓂᒻᒧᑦ.
  3. ᐃᖅᑲᓇᐃᔭᖅᑎᓄᑦ ᒪᓕᒐᐃᑦ - ᐱᒋᐊᕋᓱᓕᕈᕕᑦ ᐱᔅᓇᓯᒥᒃ ᖃᐅᔨᒪᑦᑎᐊᕆᐊᓕᑎᑦ ᒪᓕᒐᐃᑦ ᓇᓗᓇᐃᕆᔪᑦ ᐃᖅᑲᓇᐃᔭᖅᑎᖃᖅᑐᑦ ᒪᓕᒋᐊᓕᖏᓐᓂᒃ. ᒪᓕᒐᐅᑉ ᐱᔾᔪᑎᖓ ᓇᓗᓇᐃᕆᓪᓗᓂ ᐱᔪᓐᓇᐅᑎᖏᓐᓂᒃ ᐱᓕᕆᔭᕆᐊᓕᖏᓐᓂᓪᓗ ᐃᖅᑲᓇᐃᔭᖅᑎᑦᑎᔪᑦ ᐃᖅᑲᓇᐃᔭᖅᑎᓪᓗ ᓄᓇᕘᑉ ᐃᓗᐊᓂ. ᑖᓐᓇ ᒪᓕᒐᖅ ᓇᓗᓇᐃᕆᒻᒥᔪᖅ ᐅᓐᓂᓪᓘᑎᑦ ᑲᒪᒋᔭᐅᓂᖏᓄᑦ. ᐱᓕᕆᐊᔅᓴᖏᑦ ᐃᖅᑲᓇᐃᔭᖅᑐᓕᕆᓂᒻᒧᑦ ᐱᓕᕆᔨᐅᑉ ᕿᑎᖓᓂ ᐊᑯᓐᓂᖅᓱᓪᓗᓂ ᐅᖃᖃᑎᒌᓪᓗᑎᒃ ᐊᖅᑮᔭᕆᐊᖃᕈᓂᓗ ᐊᑯᓐᓂᐅᒍᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖅᑎᑦᑎᔩᓪᓗ ᐱᓪᓗᒋᑦ ᐱᔪᓐᓇᐅᑏᑦ. ᑐᑭᓯᒋᐊᕈᒪᒍᕕᑦ ᑐᓴᕆᐊᕆᑦ ᐱᓕᕆᕝᕕᐊᓂ ᒪᓕᒐᓕᕆᔨᒃᑯᑦ.
  4. ᐅᓗᕆᐊᓇᖅᑕᐃᓕᒪᔾᔪᑏᑦ - ᐱᔅᓇᓯᒥᒃ ᐱᒋᐊᓐᓂᐊᕈᕕᑦ ᒪᓕᒐᕋᓛᑦ ᖃᐅᔨᒪᔭᕆᐊᓕᑎᑦ ᐃᖅᑲᓇᐃᔭᖅᑎᑎᑦ ᐅᓗᕆᐊᓇᖅᑐᒦᖁᓇᒋᑦ. ᑐᑭᓯᒋᐊᕈᑎᓂᒃ ᑐᓴᖅᑎᑕᐅᔪᓐᓇᖅᑐᑎᑦ ᑐᓴᕆᐊᕝᕕᒋᒃᑭᑦ WCB-ᑯᑦ. ᑕᒪᐃᓐᓅᖓᔪᓪᓗ ᖃᓂᒪᑦᑕᐃᓕᔾᔪᑎᓄᑦ, ᐃᑯᐊᓪᓚᒃᑕᐃᓕᒪᔾᔪᑎᓄᑦ ᐅᓗᕆᐊᓇᖅᑕᐃᓕᒪᔾᔪᑎᓄᓪᓗ ᑐᕌᖅᑐᑦ ᐱᔅᓇᓯᐅᔪᓄᑦ. ᐅᓗᕆᐊᓇᖅᑕᐃᓕᒪᔾᔪᑎᓄᑦ ᐊᑐᕆᐊᓕᓐᓄᑦ, ᑐᓴᕆᐊᕝᕕᒋᒃᑭᑦ ᐊᒡᓚᒡᕕᖏᑦ ᐃᑯᐊᓚᑦᑕᐃᓕᒪᓂᒻᒧᑦ. ᖃᓂᒪᖃᑦᑕᐃᓕᒪᓂᒻᒧᑦ ᒪᓕᒐᕋᓛᖏᓐᓄᑦ, ᑐᓴᕆᐊᕝᕕᒋᒃᑭᑦ ᐋᓐᓂᐊᖅᑐᓕᕆᔨᒃᑯᑦ ᐱᓕᕆᕝᕕᖓ.
  1. ᐱᖁᑎᔾᔪᐊᒥᒃ ᐊᑐᖅᑐᐊᕈᑏᑦ – ᐊᑐᖅᑐᐊᓐᓂᐊᕈᕕᑦ ᐃᓂᒋᔭᓐᓂᒃ (ᐊᒻᒪᓘᓐᓃᑦ, ᐊᑐᖅᑐᐊᓪᓗᑎᑦ ᐊᒡᓚᒡᕕᒻᒥ), ᑐᓴᕆᐊᕝᕕᒋᒃᑭᑦ ᐊᑐᖅᑎᑦᑎᔨᓄᑦ ᑲᒪᔨᐅᓲᑦ ᑐᑭᓯᒋᐊᕝᕕᔅᓴᐅᓪᓗᑎᒃ ᐱᔨᑦᑎᕈᓐᓇᖅᖢᑎᓪᓗ ᐊᑐᖅᑐᐊᖅᑎᓂᒃ ᐊᑐᖅᑎᑦᑎᔨᓂᓪᓗ.
  2. ᐊᑎᓕᐅᕆᕝᕖᑦ ᐱᔫᒥᓴᐅᑎᖃᖅᑐᑦ – ᐱᔅᓇᓯᓄᑦ ᐊᑎᓕᐅᕝᕕᑕᖃᐅᖅᑐᖅ ᑳᓐᑐᕌᖃᑦᑕᕈᒪᔪᓄᑦ ᐱᔫᒥᓴᐃᔾᔪᑎᖃᐅᖅᖢᑎᒃ ᐆᒃᑐᕈᒪᔪᓄᑦ.
    1. ᓄᓇᕘᒥ ᓇᖕᒥᓂᖃᖅᑐᓂᒃ ᐃᑲᔫᑎ (NNI) – ᐅᓇ ᑕᑯᔅᓴᐅᑎᑕᐅᔪᖅ ᓄᓇᕘᑉ ᒐᕙᒪᒃᑯᖏᓐᓄᑦ ᑳᓐᑐᕌᖃᑦᑕᖅᑐᑦ ᐱᔅᓇᓰᑦ ᐃᑲᔫᓯᐊᖅᖢᑎᒃ (ᑳᓐᑐᕌᖓᑕ ᐊᑭᖓ ᐃᖅᑲᓇᐃᔭᖅᑐᓄᓪᓗ) ᐃᑲᔪᐃᓇᓱᒃᑐᖅ ᓄᓇᓕᓐᓂᒥᐅᓂᒃ, ᓄᓇᕘᒥᐅᓂᒃ ᐃᓄᐃᓪᓗ ᐱᔅᓇᓯᒋᔭᖏᓐᓂᒃ ᐊᑐᐃᓐᓇᖃᖁᓪᓗᒋᑦ ᐱᖁᑎᓂᒃ ᐱᔨᑦᑎᐅᑎᓂᓪᓗ ᓄᓇᕘᑉ ᒐᕙᒪᒃᑯᖏᓐᓄᑦ ᐃᓄᓕᒫᓄᓪᓗ ᐊᑭᑐᓗᐊᓐᖏᑦᑐᓂᒃ. ᑐᑭᓯᒋᐊᕈᑎᓂᒃ ᐱᒃᑲᓐᓂᕈᓐᓇᖅᐳᑎᑦ ᐱᓕᕆᕕᐊ ᓴᓇᔪᓕᕆᔨᒃᑯᑦ ᒐᕙᒪᒃᑯᓐᓄᑦ.
    2. ᐃᓄᐃᑦ ᓇᖕᒥᓂᖁᑎᖏᓄᑦ ᐊᑎᓕᐅᕝᕕᒃ (ᐊᖏᕈᑎᐊᓛᖅ 24) – ᐃᓗᐊᓂ ᐊᖏᕈᑎᐊᓛᖅ 24 ᓄᓇᕘᒥ ᓄᓇᑖᕈᑎᒧᑦ ᐊᖏᕈᑎᒻᒪᕆᐊᓂ, ᑎᑎᕋᖅᓯᒪᓂᖏᑦ ᐊᔭᐅᕈᔪᑦ ᒐᕙᒪᐅᔪᓂᒃ ᓯᕗᓕᐅᕆᖁᓪᓗᒋᑦ ᐃᓄᐃᑦ ᓇᖕᒥᓂᕆᔭᖏᓐᓄᑦ ᐊᐅᓚᑕᖏᓄᓪᓗ ᐱᔅᓇᓯᐅᔪᓄᑦ ᓄᓇᕘᒥ ᑳᓐᑐᕌᒃᑎᑦᑎᓕᕌᖓᒥᒃ. ᓄᓇᕗᑦ ᑐᓐᖓᕕᒃᑯ ᐊᐅᓚᑦᑎᕗᑦ ᐃᓄᐃᑦ ᓇᖕᒥᓂᖁᑎᖏᓄᑦ ᐊᑎᓕᐅᕝᕕᖓᓂᒃ ᑎᑎᕋᖅᓯᒪᓪᓗᑎᒃ ᐃᓄᐃᑦ ᐱᔅᓇᓯᖏᑦ ᐊᖏᕈᑎᒃᑰᖓᔪᓄᑦ. ᐱᔅᓇᓰᑦ ᐊᑎᖃᖁᒍᕕᐅᒃ, ᓄᓇᕗᑦ ᑐᓐᖓᕕᒃᑯᓐᓄᑦ ᐅᖄᓚᒋᑦ.