Ukiuqtaqtumi, nutaannguqtaqtumi aulattiarahuaqtughat; taimaittuq atuqpaktait inuilrumi Kanatami Ukiuqtaqtumi. Amihunik inungnik paaqpangniaqtutit qauhimayatuqannguqtut atauhiunngittumik ayuitamingnit hiamitpalliatillugit nanminiit ikayurahuaqhugit ikitqiyanik inuqaqtut. Taapkua nanminiuyut Jago Ikayuutait, Iqaluktuuttiaqmiittut, Nunavunmi, aullaqtilihaaqhutik tuqhutjiqiyiuvaktut, uunaqutinik alruyiliqiyiuplutiklu 2007-mi. Jago Ikayuutait tajja huli ikayuutigivagait hapkua hannaviit ikluliuqtinut, kihimi nanminilgit aklivaalliutiyumayait ikayuutait. Nanminiit hapkua aklivaalliqhimayut ilaliutiplugit kaantulaaktit, ingilrutinik atuqtittiniqmik, talvanngat manighaqtitauplutik Atuqtuarvik Kuapuriissatkunnit, angmaqhihimayut hiniktarvingnik taiyauvaktuq Umingmak Hiniktarviat.
Wilfred Wilcox taamnalu Ruth Niptanatiak-Wilcox nuliariiktut havaqatigiiktut nanminiriyaat Jago Ikayuutait taamnalu Umingmak Hiniktarviat Qitiqmiuni Aviktuqhimayumi Nunavunmi. Ilitturihimayut aullaqtilihaaqhutik taimaa ikayuqtigiingniq ilagiittiarniqlu ihumagilluaqtaghat aulattiariamik ihuaqtukkut nanminiqnik. Ikayuqtiqaqhutik nanminiit aullaqtitauhimayut aulattiaqhimaplutiklu. Taimaa unipkaaqhunga, puiguyuittut ihumaliurutigihimayaat aullaqtittiyaamik nanminiqnik ilitariplugit havaaghait aklivalliayumik aviktuqhimayuq taimaalu aghuuqtauvaghutik ilamingnit aallamik uukturiamik. Ihumaliurutigivagaallu Atuqtuarvik Kuapuriissakkut CEO-galuangat uqauhiit, “Nanminiit akiliqhiyuittut atugaqnik, inuit nanminiqnit akiliqhivaktut atukkanik.” Hapkua uqauhiit itqaumatjutigivaktaat taimaa tautuguiqtailinahuaqlugu aghuurnaqniit havaktiit nanminiqnut.
Uplumi, Jago Ikayuutait havaktiqaqtut 15-nik, aviklugit Inuinnauyut, taapkua Umingmak Hiniktarvianit havaktiqaqhutik malrungnik upluq tamaat havaktinik malrungniklu upluq avvaanik havaktiqaqhutik. Niuviqtit ikayuutait aghuurnaqtut havaaghainut tunngahuktittiyunullu taapkualu Wilcox-kut aghuuqpaktut taimaa havaktiit havakluaqpaktut aulapkaiyaamik nanminiinik. Havaktiit havaqatigiikpaktut ikayuqtigiighutik ilihimayauttiaqhutik ikayuinnarumagamik ilranaittutiklu taimaalu niamngiyaaqtittiyaamik aimayaarvingnit Hiniktarvingnit. Ilaaninnguraangat, Hiniktarvium havaktiit quviahuutigiliqpagaat niuviqtiit niripkaiplugit aimavingnit igahimayunik niqighanik taapkuatut angiyut tingmiat kaumikluuniit, talvuuna nakuuniqhanik ilihimayauttiaqtauyut ukiuqtaqtumi-tunngahuktittiyut.
Itqaumagiplugit aulattiarniit Jago Ikayuutait taamnalu Umingmak Hiniktarviat, Wilcox-kut naahurittiaqtut hivunighaanik nanminiit Iqaluktuuttiaqlu. Tautuqquuqpagaat angiyuq piksaut naammaktutut. Wilf uqaqpaktuq quviagittiaqhugit inulrammivut pitquhiillu aulapkainahuariamik iniqnirit uqauhiinik, “naunaittuq taimaa naammainnaqniaqtugut hivunighaptingni. Inulrammiit ilihimayut naalattiariamik ikkuaqtiuniaqhutik inmikkut hakugiktumik amigaiqpalliayaamik nunallaaptingni Nunavunmilu.”
Hamna naqillugu taiguaqtaghaq taiguariamik Jago Ikayuutainut Umingmak Hiniktarvianik Iqaluktuuttiaqmi, Nunavut.